Azərbaycan İnvestisiya Holdinqinin baş icraçı direktoru və İdarə Heyətinin üzvü Ruslan Əlixanov vəzifəsindən azad olunub.


Onun vəzifədən azad edilməsi ilə bağlı təqdimat Baş nazir və AİH-in Müşahidə Şurasının sədri Əli Əsədov tərəfindən verilib.


Azərbaycan İnvestisiya Holdinqinin baş icraçı direktorunun vəzifəsinin icrası müvəqqəti olaraq baş icraçı direktorun müavini Dəyanət Sədullayevə həvalə olunub.


Qərardan irəli gələrək Holdinqin İdarə Heyətinə müvafiq tapşırıqlar verilib.

"Bu gün ölkədə xidmət sahəsində “müştəri məmnuniyyəti” adı altında nə qədər bərbədar vəziyyətin olduğunu hamımız bilirik..." "Dia-az" xəbər verir ki, bunu özünün sosial şəbəkə hesabında tanınmış jurnalist Sima Babayeva yazıb.

O daha sonra fikrini belə davam etdirir: "Amma bəzi brendlər var ki, onların maskası ancaq kassaya pul ödəyənə qədər, ya da kredit müqaviləsinə qol çəkənə qədər sürür. Bunlardan biri və bəlkə də birincisi – “Baku Electronics”dir.

Gəlin real faktla danışaq. Gedib bu mağazadan tam 4000 manat verib telefon alırsan. Az pul deyil, bir ailənin aylarla yığdığı, zəhmətlə qazandığı böyük bir məbləğdir.

Fikirləşirsən ki, ad qazanıblar, böyük şəbəkədir, malın arxasında durarlar. Amma nə baş verir? Hələ heç 1 il tamam olmamış, min bir həvəslə alınan o baha telefon sıradan çıxır, xarab olur.

Problem burdan sonra başlayır. Telefon xarab olan kimi durub gedirsən bu “möhtəşəm” baku electronics-in qapısına.
Deyirsən ki, bəs problem var, kömək edin. Nə cavab alırsan? Sıfır! Hec bir addım atılmır, məsuliyyəti boyunlarından atırlar, sadəcə yola verirlər. Yəni pulu aldılar, iş bitdi! Telefonun sıradan çıxması sənin şəxsi problemindir, onların yox.

İndi isə gəlin medalın digər üzünə baxaq.
Əgər sən kredit ödənişini cəmi 1 gün gecikdirsən, nə baş verir? O dəqiqə telefonların zəngindən baş çatlayır.
Baku Electronics-in “xanımcağızları” növbəyə düzülür, gündə 20 dəfə zəng vurub adamın əsəblərini tarıma çəkirlər. Sanki dünyanı dağıtmısan, sanki böyük bir cinayət etmisən. Ödəməyə gələndə belə “həssas”, belə “təəssübkeş” olan bu şirkət, nəyə görə müştərinin pozulan hüququnu bərpa etməyə gələndə eyni canıyananlığı göstərmir?

Niyə o zaman o xanımcağızların səsi gəlmir, problemi həll etmək üçün 20 dəfə zəng vurub maraqlanmırlar?
Cavab çox sadədir: Çünki bu sistem müştəriyə xidmət etmək üçün yox, birbaşa milləti soymaq üçün qurulub!

Baku Electronics bu gün tam mənası ilə zəli rolu oynayır. İnsanların halallıqla qazandığı pulunu alana qədər min bir dildə danışırlar, pulu alandan və ya kreditə otuzdurandan sonra isə insanların qanını sorurlar. Satanda mələk cildinə girənlər, problem çıxanda və problemin aradan qaldırılmasını tələb edəndə adama arxasını çevirirlər.

Bu sadəcə bir telefon məsələsi deyil, bu, insanları saf yerinə qoymaqdır. Çünki bilirlər ki, vətəndaş çarəsizdir. Amma unudurlar ki, millətin cibinə girib, problemlərinə göz yuman brendlərin sonu hər zaman eyni olur: müştərinin etibarını tamamilə itirmək.

Təklifimiz sadədir: Əgər bir malın arxasında dura bilmirsinizsə, o baha qiymətləri də qoymayın, o tərifli reklamları da etməyin. Millətin qanını sorub cibini soymağa son qoyun!"

Dia-az

Prezident İlham Əliyev Şimali Makedoniya Respublikasının Prezidenti xanım Qordana Silyanovska-Davkovaya təbrik məktubu göndərib.

Məktubda deyilir:

"Hörmətli xanım Prezident,

Şimali Makedoniya Respublikasının müstəqilliyinin 35-ci ildönümü münasibətilə Sizə və Sizin simanızda bütün xalqınıza öz adımdan və Azərbaycan xalqı adından ən səmimi təbriklərimi çatdırıram.

Xoş ənənələr üzərində qurulan Azərbaycan-Şimali Makedoniya dövlətlərarası əlaqələrinin və tərəfdaşlığının möhkəmlənməsi və ildən-ilə yeni məzmunla zənginləşməsi məmnunluq doğurur.

Bu gün tərəfdaşlığımızın əhatə dairəsinin genişlənməsi üçün yaxşı imkanlar vardır. İnanıram ki, dost xalqlarımızın mənafelərinə uyğun olaraq Azərbaycan ilə Şimali Makedoniya arasında əlaqələrin möhkəmləndirilməsi, ikitərəfli və çoxtərəfli əməkdaşlığımızın daha da genişləndirilməsi istiqamətində birgə səylərimizi bundan sonra da uğurla davam etdirəcəyik.

Belə bir əlamətdar gündə Sizə ən xoş arzularımı yetirir, dost xalqınıza daim əmin-amanlıq və rifah diləyirəm".

“SOS” (Security Operation Services) MMC-nin növbə rəisi Azər Cəfərov həbs edilib.

Qaradağ rayonu Əlәt qәsәbәsindә yerlәşәn şirkәtlərdən birində mühafizә şirkәtinin hәmin stansiya üzrә növbә rәisi vәzifәsindә işlәyən şəxs dələduzluq əməlində təqsirli bilinib.

O, Cinayət Məcəlləsinin 178-ci (dələduzluq) maddəsi ilə ittiham edilib.

Araşdırmalar zamanı məlum olub ki, A.Cəfərov növbə rəisi işlədiyi şirkətə əlavə 11 mühafizəçinin işə götürüləcəyi vədi ilə 2 nəfərdən 20 min manata yaxın pul alıb. O, həmin pulları qumar oyunlarına qoyub və uduzub.

1980-ci il təvəllüdlü A.Cəfərov pulları Hacıqabul rayonunda aldığından onun barəsindəki işə rayon məhkəməsində baxılıb. Bildirilib ki, A.Cəfərov əvvəllər də dələduzluq əməli törədib və buna görə məhkum edilib. Hacıqabul Rayon Məhkəməsinin budəfəki hökmü ilə ona 2 il 2 ay həbs cəzası verilib.

A.Cəfərovun həbsdən sonra 1 il 6 ay müddәtinә dövlәt vә yerli özünüidarәetmә orqanlarında rәhbәr vә maddi-mәsul vәzifә tutmaq hüququ da məhdudlaşdırılıb.(Qafqazinfo)

Bakının Yasamal rayonunda, Cəfər Cabbarlı küçəsində səkilərin vəziyyəti sakinlərin narazılığına səbəb olub.

Bizimxeber.media-nın məlumatına görə, küçənin bir sıra hissələrində piyadaların hərəkəti üçün nəzərdə tutulan səkilər baxımsız vəziyyətdədir.

Ərazidən çəkilən görüntülərdə səkilərin dağıldığı, bəzi yerlərdə pilləkənlərin qırıldığı, örtüyün sıradan çıxdığı və piyadaların hərəkəti üçün əlverişsiz şərait yarandığı görünür.

Mövcud vəziyyət xüsusilə yaşlı insanların, uşaqların və hərəkət imkanları məhdud şəxslərin küçədə təhlükəsiz hərəkətini çətinləşdirir.

Sakinlərin sözlərinə görə, şəhərin mərkəzi küçələrindən birində belə vəziyyətin yaranması narahatlıq doğurur. Onlar aidiyyəti qurumların əraziyə baxış keçirməsini, dağılan səkilərin bərpa olunmasını və piyadaların təhlükəsiz hərəkəti üçün normal şərait yaradılmasını istəyirlər. Sakinlər həmçinin Yasamal rayonunda bu kimi problemlərin aradan qaldırılması üçün daha effektiv nəzarətin həyata keçirilməsini xahiş edirlər.

"Naxçıvan Dövlət Universiteti" Publik Hüquqi Şəxsi 2023, 2024 və 2025-ci illər üzrə maliyyə hesabatlarına rəy verilməsi üçün kənar audit xidmətinin satın alınması ilə bağlı keçirdiyi tender müsabiqəsinə yekun vurub.

32gun.az-ın əldə etdiyi məlumata görə, satınalmanın qalibi "AZƏRUÇOT" Məhdud Məsuliyyətli Cəmiyyəti olub.

Tərəflər arasında imzalanmış satınalma müqaviləsinin ümumi maliyyə dəyəri dəqiq 73.622,00 AZN təşkil edir.

Məlumata görə, 73 min manatdan çox dəyəri olan tenderin qalibi seçilən "AZƏRUÇOT" MMC-nin dövlət büdcəsinə 1.706,68 AZN vergi borcu mövcuddur. Nizamnamə kapitalı 100 AZN olan və Bakı şəhəri, Xətai rayonu, Yusif Səfərov küçəsi, ev 18, mənzil 163 ünvanında hüquqi qeydiyyatda bulunan şirkətin qanuni təmsilçisi Eldar Təhməzov Azay oğludur.

“Kayu” uşaq bağçası ilə bağlı ciddi faktlar üzə çıxıb.
Ajans.az xəbər verir ki, valideyn 2 yaş 2 aylıq övladının bağçadan dəfələrlə bədənində göyərmələr və xəsarət izləri ilə qayıtdığını bildirib. Onun sözlərinə görə, bağçadan bu halların uşağın yıxılması ilə bağlı olduğu deyilib.

Daha ciddi iddia isə uşağın gigiyenası ilə bağlıdır. Valideynin sözlərinə görə, uşağa səhər geyindirilən pampers təxminən 7 saat ərzində dəyişdirilməyib və uşaq evə gəldikdə nəcis içində olub.

Valideyn bağçaya etiraz etdikdə isə ona “xoşunuz gəlmir, çıxarın”, şikayət edəcəyini bildirdikdə isə “gedin, hara istəyirsiniz şikayət edin” deyildiyini iddia edib.

Ajans.az məsələ ilə bağlı bağçanın fəaliyyətinin hüquqi əsaslarını da araşdırıb.

Araşdırmamız zamanı məlum olub ki, “Kayu” uşaq bağçasının Həzi Aslanov filialının lisenziyası yoxdur.

İqtisadiyyat Nazirliyindən də sorğumuza cavab olaraq “Kayu” uşaq bağçasının Həzi Aslanov filialının lisenziyasının olmadığı təsdiqlənib.

Beləliklə, uşağın təhlükəsizliyi və ona göstərilən qayğı ilə bağlı valideynin ciddi iddialar səsləndirdiyi bağçanın fəaliyyət lisenziyasının da olmadığı ortaya çıxıb.

Ajans.az məsələ ilə bağlı “Kayu” bağçasına sorğu göndərərək həm valideynin iddialarına, həm də filialın lisenziyasız fəaliyyət göstərməsinə münasibəti öyrənməyə çalışıb.

Bağçadan sorğumuza cavab verilməyib.

Elm və Təhsil Nazirliyinin tabeliyində fəaliyyət göstərən uşaq bağçalarında qida təminatının monitorinqi ilə bağlı “DEPOT” MMC ilə bağlanmış yeni müqavilə dövlət vəsaitlərinin istifadəsi baxımından diqqət çəkir.

Məlumata görə, 7 avqust 2026-cı ildə “DEPOT” MMC ilə 1 milyon 674 min 656 manatlıq müqavilə bağlanıb. Müqavilənin predmeti uşaq bağçalarında qida təminatının monitorinqi üzrə xidmətlərin göstərilməsidir.

Burada ilk baxışdan sadə görünən bir sual var:

1 milyon 674 min 656 manatlıq monitorinq xidmətinin konkret məzmunu nədir?
Çünki “qida təminatının monitorinqi” ifadəsi özlüyündə bu qədər böyük məbləğin nəyə xərclənəcəyini izah etmir. Dövlət vəsaiti ayrılırsa, ictimaiyyət bilməlidir: bu pula konkret hansı xidmətlər göstəriləcək?
Neçə uşaq bağçası monitorinq olunacaq?
Monitorinq neçə dəfə aparılacaq?
Bir bağçanın monitorinqinə orta hesabla nə qədər vəsait düşür?
DEPOT MMC bu iş üçün neçə əməkdaş cəlb edəcək?
Laborator analizlər aparılacaqmı?
Ərzaq nümunələri götürüləcəkmi?
Bağçalarda menyu, ərzağın keyfiyyəti, saxlanma şəraiti və porsiyalar yoxlanılacaqmı?
Və ən əsası — bu işlərin hər birinin qiyməti necə hesablanıb?
429 mindən 1,67 milyona
Məsələni maraqlı edən digər məqam isə DEPOT MMC ilə bağlı əvvəlki müqavilələrin də olmasıdır.
Açıq mənbələrdə eyni istiqamətdə 429 118 manatlıq müqavilə barədə məlumat yayılıb. Sonrakı müqavilənin məbləği isə 1 674 656 manatdır.
İki müqavilə arasındakı fərq:
1 245 538 manat.
Deməli, ortaya çox konkret sual çıxır:
Nə dəyişdi ki, dövlətin ödədiyi məbləğ 1 milyon 245 min 538 manat artdı?
Bağçaların sayı artıb?
Monitorinqin əhatə dairəsi genişlənib?
Xidmətlərin sayı çoxalıb?
Müqaviləyə yeni işlər əlavə edilib?
Yoxsa qiymətin artmasının başqa iqtisadi əsaslandırması var?

Bu sualların cavabı müqavilənin texniki şərtləri və qiymət hesablamasında öz əksini tapmalıdır. “Monitorinq”in nəticəsi nə olacaq? Dövlət 1,67 milyon manat ödəyirsə, bu xərclə yanaşı nəticə də ölçülməlidir.

Məsələn, müqavilənin sonunda neçə bağçada problem aşkarlanıb?
Neçə nöqsan qeydə alınıb?
Hansı bağçalarda qida təminatı ilə bağlı çatışmazlıqlar aradan qaldırılıb?
Təkrar monitorinqlər keçirilibmi?
Monitorinq nəticəsində uşaqların qidalanmasının keyfiyyətində konkret hansı dəyişiklik baş verib?

Əgər bu sualların cavabı yoxdursa və ya nəticələr ictimaiyyətə açıqlanmırsa, onda 1 milyon 674 min 656 manatın səmərəliliyini necə qiymətləndirmək olar?

DEPOT MMC-ni nazirliklə bağlayan nədir?

Araşdırmanın daha bir mühüm istiqaməti də budur. Söhbət yalnız bir müqavilədən getmir. DEPOT MMC ilə Elm və Təhsil Nazirliyinin sistemi arasında müxtəlif məbləğlərdə müqavilələrin olması şirkətin bu sahədə fəaliyyətinin ardıcıllığını araşdırmağı zəruri edir. Xüsusilə də, söhbət yüz minlərlə manatlıq müqavilələrdən milyonlarla manatlıq müqavilələrə keçiddən gedirsə. Burada heç kimi əsassız ittiham etmək niyyətimiz yoxdur. Əksinə, sualımız çox sadədir:

DEPOT MMC hansı meyarlarla seçilir?

Şirkətin bu işləri həyata keçirmək üçün hansı maddi-texniki və peşəkar imkanları var?
Müqavilə qiymətləri hansı hesablamalar əsasında müəyyənləşdirilir?
Eyni və ya oxşar xidmətlər üzrə əvvəlki müqavilələrlə sonrakı müqavilələr arasında fərq nədən ibarətdir?
Və ən əsası:
Dövlət bu müqavilələr üzrə ödədiyi vəsaitin müqabilində hansı ölçülə bilən nəticəni əldə edir?

Sənədlər danışmalıdır

“DEPOT” MMC ilə bağlı dövlət vəsaitlərinin həcmi artdıqca, ictimai maraq da artır. Ona görə Elm və Təhsil Nazirliyindən və aidiyyəti qurumlardan gözlənti odur ki, 1 milyon 674 min 656 manatlıq müqavilənin texniki şərtləri, xidmətlərin həcmi, qiymət hesablaması və monitorinqin nəticələri barədə ictimaiyyətə aydın məlumat verilsin. Çünki dövlət büdcəsindən ayrılan pul sadəcə rəqəm deyil. Bu, cəmiyyətin puludur.

Və 1 milyon 674 min 656 manat “monitorinq” adı ilə xərclənirsə, cəmiyyətin “bu pula konkret nə alındı?” sualını verməsi tamamilə haqlıdır.
Biz də bu sualın cavabını sənədlər üzərindən araşdırmağa davam edəcəyik.

Bizimesr.media

"SOCAR "Azəriqaz"da heç Baş direktoru eşidən var ki?

Bunu sözügedən qurumun işçisi Xəqani Əsgərov Neftçilərin Hüquqlarının Müdafiəsi Təşkilatının (NHMT) sosial şəbəkə hesabındakı paylaşımında qeyd edir.

O daha sonra fikrini belə davam etdirir: ""Azəriqaz"ın bəzi regional idarələri var ki, hərə özünə bir ağadır... Bakı regional idarəsi bir ayrıca "Azəriqaz" idarəsidir. İstədiklərini edirlər. Qapıçıdan mühəndis düzəldirlər... Savadı olmasa da olar, əsas rəhbərliyin həmyerlisi, yaxını olsun... Bakı şəhərinin 12 rayonunu 16 edib, özündən rəis təyin edib. Bakı Regional Qaz İstismarı İdarəsi bu gün az qala "Azəriqaz"ın özünə alternativdir...

Bundan sonra bu qurumun rəhbəri baş direktoru eşidər? Faktiki olaraq da eşitmir. Yuxarı təşkilatlara yalan məlumat verməkdən belə çəkinmir. Bu qədər qaz itkisi var Bakı regionalın ayağında... Hara gedir bu qədər qaz itkisi...

Əslində qaz itmir, kimlərsə özünə obyekt, kimlərsə "Lexsus", kimlərsə villa və başqa əmlakları əldə edir bu itkilərin hesabına... 5 manat borcu olan vətəndaşın qapısına üç maşın göndərirlər ki kəsin onun qazını... Bəs bu qədər itki nədən, necə yaranır və arta-arta gedir...

SOCAR-ın vitse-prezidenti Elşad Nəsirov xəbərdarlıq edir. Dövlət stastistika komitəsi həyəcan təbili çalır ki, itkilər artıq... Bunlar isə gündə bir iclas keçirib, özlərini iş görən kimi göstərirlər... Real tədbir görmək sərf etmir axı bunlara...".

Bizimesr.media

Peşə Təhsili üzrə Dövlət Agentliyinin ixtisas fənn müəllimi və istehsalat təlimi ustası vəzifələrinə işə qəbul üzrə müsabiqənin müsahibə mərhələsinin nəticələri elan olunub.

Bizimesr.media bildirir ki, Agentliyin rəsmi sosial hesabında yaydığı məlumatda qeyd olunur ki, müsabiqədən müvəffəqiyyətlə keçmiş ixtisas fənn müəllimləri və istehsalat təlimi ustaları tələb olunan sənədləri qəbul olunduqları peşə təhsili müəssisəsinə təqdim etməklə qeydiyyatdan keçməlidirlər. Yəni, artıq müsahibə bitib və cavablar bəllidir...

Lakin bu paylaşımın ardınca müsabiqədə iştirak edən, amma hələ də nəticələri barədə cavab ala bilməyən şəxslərin narazılığı diqqət çəkib. Paylaşımın şərh bölməsində iştirakçılar Agentliyə suallar ünvanlayıblar. Onlar müsabiqənin nəticələri, cavabların nə vaxt açıqlanacağı və müraciətlərə hansı formada cavab veriləcəyi ilə bağlı məlumat istəyiblər.

Belə ki, şərhlərin birində yazılır...

“Azərbaycan Respublikası Elm və Təhsil Nazirliyi Peşə Təhsili üzrə Dövlət Agentliyi, sizdən suallarıma cavabı necə, hansı formada ala bilərəm? Nə zəngə, nə mesaja cavab verilir!”

Digər iştirakçılar da nəticələrin nə zaman açıqlanacağı ilə bağlı suallar veriblər. Amma Agentlikdən heç bir cavab verilməyib.

Müsabiqədə neçə nəfər iştirak edib, neçə nəfər uğur qazanıb?

Narazılığın əsas səbəblərindən biri də Peşə Təhsili üzrə Dövlət Agentliyinin müsabiqə ilə bağlı ətraflı statistikanı açıqlamamasıdır. Agentliyin neçə nəfəri müsabiqənin növbəti mərhələsinə keçirdiyi, neçə nəfərin uğurlu nəticə əldə etdiyi, hansı peşə təhsili müəssisələrinə neçə müəllim və istehsalat təlimi ustasının qəbul olunduğu barədə ictimaiyyətə ətraflı məlumat verilmir.

Müsabiqədə iştirak edən şəxslər isə nəticələrin şəffaf şəkildə açıqlanmasını və verilən sualların cavablandırılmasını istəyirlər.

Məlumata görə, müsahibə mərhələsindən çox az sayda şəxsin uğurlu nəticə əldə etdiyi, boş qalan yerlərə isə müqavilə əsasında işə qəbul prosesinin davam etdiriləcəyi bildirilir.

Müqavilə ilə işə qəbul məsələsi də narazılıq doğurur

Peşə təhsili sistemində müqavilə əsasında işə qəbul son illərdə daha aktiv xarakter alıb. İddialara görə, direktorlar Peşə Təhsili üzrə Dövlət Agentliyində çalışan rəhbər şəxslərlə razılaşdırılmış şəkildə boş ştat yerlərinə birillik müqavilə ilə şəxsləri işə qəbul edirlər.

Bu məsələ uzun illərdir narazılıqlarla qarşılanır. Müsabiqədə iştirak edən, yüksək bal toplayan və müsahibəyə dəvət olunan, lakin sonda “qəbul edilmədi” cavabı alan şəxslərin kənarda saxlanıldığı, bunun əvəzində isə ümumiyyətlə peşə təhsili sisteminə aid olmayan, imtahanda iştirak etməyən və təcrübəsi olmayan şəxslərin birillik müqavilə ilə işə qəbul edildiyi ilə bağlı faktlar mövcuddur. İddialara görə, müqavilə ilə işə qəbullar bəzi direktorlarla əvvəlcədən razılaşdırılır və müxtəlif yollarla həyata keçirilir. Bu iddiaların aidiyyəti qurumlar tərəfindən araşdırılması zəruridir. Müqavilə ilə işə qəbul edilən şəxslərin kimliyi, onların direktorlarla və Agentliyin rəhbər şəxsləri ilə hansı qohumluq, yaxınlıq, dostluq və digər əlaqələrinin olub-olmaması da araşdırılmalı məsələlərdəndir. Əgər bu iddiaları Agentliyin özü araşdıra bilmirsə, digər aidiyyəti qurumlar tərəfindən araşdırılması vacibdir.

Məlumata görə, artıq müqavilə əsasında işə qəbul prosesi başlayıb və boş qalan yerlərə kütləvi şəkildə müqavilə ilə işə qəbul həyata keçiriləcək.

Peşə mərkəzlərində texniki işçilərlə bağlı da iddialar var

Bununla yanaşı, iddialara görə, bir sıra peşə təhsili mərkəzlərində çoxsaylı texniki işçilər də işə qəbul edilib. İddialarda həmin şəxslərin bir qisminin direktorların və Peşə Təhsili üzrə Dövlət Agentliyində çalışan rəhbər şəxslərin qohumları, dostları və yaxınları olduğu bildirilir. Bu, peşə təhsili sistemində işə qəbul prosesinin şəffaflığı ilə bağlı ciddi problemlərin mövcudluğunu göstərən faktlar hesab olunmalıdır.

Məhz bu faktlar imtahan və müsabiqə prosesinin formal keçirilməsi ilə bağlı sualları da gündəmə gətirir. İmtahanda iştirak edib yüksək nəticə göstərən şəxslərin işə qəbul edilməməsi, digər tərəfdən isə müsabiqədə iştirak etməyən şəxslərin müqavilə əsasında işə götürülməsi ilə bağlı iddialara aydınlıq gətirilməlidir.

Yeni rəhbərlik köhnə problemləri aradan qaldıra bilmədi?

Peşə Təhsili üzrə Dövlət Agentliyinin direktoru İlqar Bayramlının fəaliyyəti ilə bağlı da narazılıqlar səsləndirilir. Mövcud iddiaların araşdırılmaması və işə qəbul prosesinin şəffaflığı ilə bağlı sualların cavabsız qalması isə peşə təhsili sistemində əvvəlki problemlərin yeni rəhbərlik dövründə də davam etdiyini göstərir.

İndi əsas sual budur - Peşə Təhsili üzrə Dövlət Agentliyi müsabiqənin nəticələri ilə bağlı tam statistikanı nə vaxt açıqlayacaq və iştirakçıların cavabsız qalan suallarına niyə aydın cavab verilmir?

Məsələ ilə bağlı Peşə Təhsili üzrə Dövlət Agentliyinin mövqeyini dərc etməyə hazırıq.