İnnovasiya və Təchizat Mərkəzi tibb müəssisələrində istifadə üçün nəzərdə tutulmuş spesifik ləvazimat və sərfiyyat mallarının satın alınması ilə bağlı tenderə yekun vurub. Tenderin qalibi “Azəri Med” Qapalı Səhmdar Cəmiyyəti (QSC) seçilib. Artıq tərəflər arasında satınalma müqaviləsi imzalanıb.

Müqavilənin maliyyə dəyəri 422 026 manatdır. “Azəri Med” QSC bununla 2026-cı ildə bağladığı satınalma müqavilələrinin sayını 11-ə çatdırıb. Bu müqavilələrin ümumi maliyyə dəyəri 16 370 948,95 manatdır. İqtisadiyyat Nazirliyi yanında Dövlət Vergi Xidmətinin reyestr məlumatlarına görə, “Azəri Med” QSC 2004-cü ildə qeydiyyata alınıb. Nizamnamə kapitalı 8 255 510 manatdır. Şirkətin hüquqi ünvanı Bakı şəhəri Nərimanov rayonu, Asif Məmmədov küçəsi, ev 30F-də yerləşir.

QSC-nin qanuni təmsilçisi Rəhimli Famil Vəli oğludur. Mediada gedən məlumatlarda iddia edilir ki, “Azəri Med” QSC-nin sahibi deputat Kamaləddin Qafarovdur. O, deputat olmamışdan əvvəl Milli Onkologiya Mərkəzinin direktor müavini vəzifəsində işləyib.

Azəri Med QSC-nin əsasən MOM-un tenderlərinin qalibi seçilməsi də bununla əlaqələndirilir. Digər tərəfdən, 2009-2013-cü illərdə Azəri Med QSC-nin qanuni təmsilçisi Qafarov Hüsaməddin Şəmsəddin oğlu adlı şəxs olub. İddialara görə, bu şəxs Kamaləddin Qafarovun yaxın qohumudur. Azəri Med QSC-nin 2020-ci ilədək qeydiyyatda olduğu ünvanla bağlı da maraqlı iddialar var.

Bildirilir ki, şirkətin hüquqi ünvanı olmuş Bakı şəhəri Binəqədi rayonu, Mustafa Kamal Atatürk prospekti, ev 65 A, məhəllə 3078A, mənzil 155-də Kamaləddin Qafarov və ailə üzvləri qeydiyyatdadır. Kamaləddin Qafarova məxsus başqa şirkətlərin də olduğu deyilir.

Bunlar “Versal Palace” MTK, “Kanon” MMC,”Shafran” MMC, “Avestafarm” MMC, “Mega Pharmacy” MMC, “Naturalist” Fərdi Firması, “Helios Paharma” MMC və “Salidont LTD”-dir. Bu iddialar indiyədək deputat tərəfindən təkzib edilməyib. Azərbaycan qanunvericiliyinə görə deputatın biznes fəaliyyəti ilə məşğul olması qadağandır.

Realazerbaycan.az

13 saylı Bərdə Regional Meşə Təsərrüfatı Mərkəzinin rəhbərliyinin vəzifə səlahiyyətlərindən sui-istifadə halları ilə bağlı növbəti dəfə iddialar yayılıb.

Pravda.az xəbər verir ki, sosial şəbəkədə Mərkəzin keçmiş əməkdaşlarından biri 13 saylı Bərdə Regional Meşə Təsərrüfatı Mərkəzinin Qarxun Meşəbəylinin 5 saylı sahəsində məhsul verən nar bağının və yulğun kollarının məhv edilməsi ilə bağlı görüntüləri paylaşıb.

Sözügedən şəxsin aprelin 11-də, səhər saatlarında 09:47-də çəkdiyi görüntülərdən də görünür ki, məhv edilən, kökündən çıxarılan ağacları traktor daşıyarkən ərazi nəzarətsiz olub.

13 saylı Bərdə Regional Meşə Təsərrüfatı Mərkəzinin rəhbəri Məzahir Qasımovun onu işdən çıxardığını deyən vətəndaş Qasımovun ona “İcrada işləmiş adamam, rəis də, prokuror da məni tanıyır, könüllü ərizə yazıb işdən çıxmasan, səni cərimə ilə çıxartdıracağam” dediyini iddia edir: “Mən də imkansız olduğum üçün məcbur qalıb ərizəni yazmışam”.

O, həmçinin nar bağının və yulğun kollarının kütləvi kəsilməsində Qasımovla yanaşı, sahə rəisi Ənvər Hümbətovun, əraziyə nəzarət edən Yunis Cəfərəlinin şəxsi maraqları naminə əlbir olduqlarını, ağacların yerində qalan boşluqları ört-basdır etdiklərini, ərazini satdıqlarını da iddia edib.

Pravda.az məsələ ilə bağlı Ekologiya və Təbii Sərvətlər Nazirliyinə sorğu ünvanlasa da, mövqe bildirilməyib.

Xatırlatma: Bundan əvvəl Pravda.az saytına ünvanlanmış məktubda yazılan şikayətdə 2024-cü ilin noyabr ayından 13 saylı Bərdə Regional Meşə Təsərrüfatı Mərkəzinə təyin olunan Məzahir Qasımov vəzifə səlahiyyətlərindən sui-istifadə edərək meşə təsərrüfatını şəxsi əmlakı kimi idarə etdiyi bildirilmişdi. İddia edilirdi ki, RMTM-nin daxili xərclərinin (gələn qonaqların qarşılanması, təsərrüfat malları üçün) ödənilməsi üçün meşəbəyliklərdən pullar yığılır. “M.Qasımov 8 saylı Bərdə Regional Nəqliyyat İdarəsindəki nəqliyyat vasitələrini və traktorları öz şəxsi torpaq sahələrində istifadə edir. Nəqliyyat idarəsinin meşələrin suvarılmasında istifadə olunan sudartıcı nasosaları M.Qasımovun şəxsi qadağalı sahələrinda istismar olunur. Ekologiya və Təbii Sərvətlər Nazirliyi bu məsələnin araşdırılmasında maraqlı olarsa, traktorlardakı GPS sisteminə baxış keçirərlər”, - məlumatda qeyd olunurdu.(Pravda.az)

Həmin vaxt Ekologiya və Təbii Sərvətlər Nazirliyi məlumatları təkzib etmişdi.

Paytaxtın pərakəndə satış sektorunda fəaliyyət göstərən “Tamstore” mağazalar şəbəkəsi ilə bağlı sosial şəbəkələrdə yayılan bəzi iddialar istehlakçıların diqqət mərkəzinə düşüb. Paylaşılan görüntülərdə mağazalarda bəzi məhsulların, xüsusilə də kolbasaların istifadə müddətinin bitməsinə baxmayaraq, hələ də piştaxtalarda saxlanıldığı və endirimli qiymətlərlə təklif edildiyi bildirilir.

Bu cür hallar alıcılar arasında haqlı suallar doğurur, çünki qida məhsullarının, xüsusən də tez xarab olan ət məhsullarının saxlanma şəraiti və vaxtı birbaşa sağlamlıqla bağlı məsələdir. Mağazalar şəbəkələrində bəzən texniki səhvlər və ya diqqətsizlik ucbatından bu növ halların baş verməsi mümkündür, lakin bu, qida təhlükəsizliyi qaydalarının daha ciddi şəkildə tətbiq edilməsinin vacibliyini bir daha gündəmə gətirir. Vətəndaşların bu mövzuda həssaslıq nümayiş etdirməsi istehlakçı mədəniyyətinin formalaşması baxımından müsbət addım olsa da, məsələnin rəsmi və peşəkar müstəvidə araşdırılmasına ehtiyac var.

Məsələ ilə bağlı qida eksperti Orxan Vəlizadə NOCOMMENT.az-a bildirib ki, qida məhsullarının yararlılıq müddəti məsələsində həm mağaza, həm də alıcı ehtiyatlı davranmalıdır: “Kolbasa və digər ət məhsulları tərkib etibarilə çox həssasdır. Bu məhsulların istifadə müddəti bitdikdə onlarda mikrobioloji proseslər başlaya bilər ki, bu da arzuolunmaz nəticələrə yol açar. Əgər bir məhsulun vaxtı keçibsə, o, hansısa aksiya və ya endirim kampaniyasına daxil edilməməli, dərhal satış zonasından kənarlaşdırılmalıdır. İstehlakçılarımız da diqqətli olmalı, xüsusilə endirimli məhsul alarkən onun istehsal və son istifadə tarixlərinə mütləq nəzər salmalıdırlar”.

Onun sözlərinə görə, marketlərdə daxili nəzarət mexanizminin düzgün qurulması bu cür xoşagəlməz halların qarşısını ala bilər: “Məhsulun istifadə müddətinin izlənməsi mağaza menecerlərinin və məsul şəxslərin birbaşa vəzifəsidir. Görüntülərdən anlaşılan odur ki, bu zəncirdə müəyyən bir axsamalar mövcuddur. Biz tövsiyə edirik ki, mağaza rəhbərliyi bu məsələyə daha peşəkar yanaşsın və işçilərin məsuliyyətini artırsın. Çünki kiçik bir diqqətsizlik belə həm mağazanın imicinə zərər vura bilər, həm də insanların qidalanma təhlükəsizliyi ilə bağlı narahatlıq yarada bilər”.

Ekspert əlavə edib ki, bu cür halların qarşısını almaq üçün mütəmadi monitorinqlər aparılmalıdır: “Əsas məqsəd cərimələmək deyil, qida təhlükəsizliyi zəncirini düzgün qurmaqdır. Aidiyyatı qurumlar tərəfindən aparılan yoxlamalar sahibkarları daha məsuliyyətli olmağa sövq edir. Alıcılar hər hansı bir şübhəli məqamla qarşılaşdıqda mağaza rəhbərliyinə müraciət etməli və ya müvafiq dövlət orqanlarını məlumatlandırmalıdırlar. Sağlam qidalanma hər bir vətəndaşın fundamental hüququdur və bu hüququn qorunması üçün qarşılıqlı nəzarət mexanizmi işləməlidir”.(NOCOMMENT.AZ)

VİDEO LİNKDƏ: https://nocomment.az/tamstore-da-endirim-telesi-insanlar-bele-aldadilir-video/

“Lənkəran rayon Mərkəzi Xəstəxanası” publik hüquqi şəxsi tərəfindən bir mənbədən satınalma metodu tətbiq edilməklə “Azercell Telekom” Məhdud Məsuliyyətli Cəmiyyəti ilə telekommunikasiya xidmətləri üzrə 1.440 manat məbləğində satınalma müqaviləsi bağlanılıb. Məlumat satınalmaların portalında 11.04.2026-cı ildə dərc edilib.

Satınalmaların portalı üzərindən apardığımız araşdırmada məlum oldu ki, Lənkəran rayon Mərkəzi Xəstəxanası telekommunikasiya xidmətləri üzrə bir satınalma müqaviləsi də “Aztelekom” MMC ilə 31.01.2026-cı ildə bağlayıb. Bu müqavilənin dəyəri isə 32.040 manat təşkil edib.

Göründüyü kimi Lənkəran rayon Mərkəzi Xəstəxanası yalnız 2026 ildə telekommunikasiya xidmətinə dair bir mənbədən satınalma metodu tətbiq etməklə 2 satınalma müaviləsi bağlayıb. Bunun ümumi dəyəri 33 480 28 manat təşkil edib.

Qeyd edək ki, Rəqəmsal İnkişaf və Nəqliyyat Nazirliyinin müəyyən etdiyi tariflərə görə sabit şəbəkə telefonlarından istifadəyə görə aylıq abunə haqqı tarifinə görə qeyri-əhaliyə 7,0 manatdır. Bu Azərbaycan Respublikasının Tarif (Qiymət) Şurasının 7 nömrəli Qərarı, 26 oktyabr 2022-ci il tarixli qərarı ilə təsdiq olunub.

Dövlət Statistika Komitəsinin 20 oktyabr 2025-ci ildə yaydığı məlumata görə Azərbaycanda 2024-cü il üzrə sabit şəbəkə telefonları (ev telefonları) istifadəçilərinin sayı azalıb. Bildirilib ki, ötən il ölkədə sabit şəbəkə telefonlarının ümumi sayı 1 milyon 175 min nömrə təşkil edib. Onlardan 1 milyon 95 min 200-ü mənzillərdə olan sabit şəbəkə telefonlarıdır. Dövlət Statistika Komitəsinin məlumatlarından da göründüyü kimi qeyri-əhalinin xidmətində 80 minə yaxın telefon var.

Buradan sual yaranır. Lənkəran rayon Mərkəzi Xəstəxanasının istifadəsində nə qədər sabit şəbəkə telefonları var ki, il ərzindəyə istifadəyə görə 32 min manatdan çox vəsait ayırır?

Lənkəran rayon İcra Hakimiyyətinin rəsmi portalında Lənkəran rayon Mərkəzi Xəstəxanasının əlaqə telefonları: (025) 254 48 39 (025) 254-16-64 cavab verən yoxdur və ya işləmir. Xəstəxananın instagram səhifəsində göstərilən əlaqə nömrəsi: 025 254 79 32 də işləmir. Belə olan halda 32 min manat hara, nə məqsədlə ayrılb?

Maraqlıdır, Lənkəran şəhər İcra Hakimiyyətindən bizə bildirdilər ki, telefon nomrələrində dəyişiklik olduğuna görə işləmir. İcradan bizə verdikləri bir neçə yeni telefon nömrələrinin də müəyyən olunmadığı məlum oldu oldu. Göründüyü kimi Lənkəran rayon Mərkəzi Xəstəxanası işləməyən sabit şəbəkə telefonlarından istifadəyə görə dövlət vəsaitlərini ya boş-boşuna ayırır, ya da telekommunikasiya xidmətləri adı altında başqa istiqamətlərə.

Müqayisə üçün qeyd edək ki, Şəki şəhəri İcra Hakimiyyəti (Lənkəran rayon İcra Hakimiyyəti açıqlamayıb) 2026-cı il ərzində telekommunikasiya xidmətlərinin göstərilməsi məqsədi ilə “Aztelekom” MMC ilə 23.368,8 manat məbləğində satınalma müqaviləsi bağlayıb. Buraya Şəki rayonun bitün kənd icra nümayəndəliklərinə telekommunikasiya xidmətinin göstərilməsi də daxildir.

Yenə sual yaranır. Bir şəhər xəstəxanasına göstərilən telekommunikasiya xidməti bütov bir rayon İcra Hakimiyyətinə kənlərlə birlikdə göstərilən telekommunikasiya xidmətindən necə çox ola bilər?

Göründüyü kimi Lənkəran rayon Mərkəzi Xəstəxanasının 2026 ildə telekommunikasiya xidməti üzrə bağladığı müqavilədə ziddiyətli, şübhəli məqamlar çoxdur. Burada müqavilənin qiymətinin nə qədər şişirdildiyini mütəxəsislər araşdırsa daha yaxşı olar.

Qeyd edək ki, Lənkəran rayon Mərkəzi Xəstəxanasının keçirdiyi satınalmalarda şübhəli məqamlar bunlarla bitmir. Belə ki, Xəstəxana 12.01.2026-cı ildə su təchizatı və tullantı sularının axıdılması xidmətinə dair “Regional Su Meliorasiya Xidməti” PHŞ Lənkəran Su Meliorasiya Sistemlərinin İstismarı İdarəsi ilə iki satınalma müqaviləsi bağlayıb. 99.380 manat dəyərində bir, 49.690 manat dəyərində də bir.

Sual yaranır. Lənkəran rayon Mərkəzi Xəstəxanasında il ərzində nə qədər tullantı suları hasil olur ki, müəssisə ümumi dəyəri 149 070 manat dəyərində iki müqavilə bağlayıb? Bu müqavilədə də qiymətin süni şəkildə şişirdildiyi açıq aşkar görsənməkdədir.

Qeyd edək ki, Lənkəran rayon Mərkəzi Xəstəxanası 27.05.2025-ci ildə hasil olan müxtəlif növ tibbi tullantıların daşınması və zərərsizləşdirilməsi xidmətləri üzrə “BT TEXNO SERVİS” MMC ilə 198.172,12 manat məbləğində satınalma müqaviləsi bağlayıb.

Qeyd edək ki, tibbi tullantıların zərərsizləşdirilməsi prosesi Ekologiya və Təbii Sərvətlər Nazirliyinin nəzdində fəaliyyət göstərən “Tullantıların İdarəedilməsi Mərkəzi” MMC tərəfindən Sumqayıt şəhərinin yaxınlığındakı poliqonda həyata keçirilir. Bunun üçün şirkət həftədə bir neçə dəfə Lənkərandan Sumqayıta yol qət etməli olur.

Sual yaranır. Lənkərandan Sumqayıta tibbi tullantıların daşınmasına 198.172 manat, elə Lənkərənda tullantı sularının axıdılmasına da 149 070 manat. Çox şübhə yaratmırmı?

Bundan əlavə Lənkəran rayon Mərkəzi Xəstəxanası 22.12.2025-ci ildə tələb olunan müxtəlif növ avadanlıqların təmiri xidmətlərinin satınalınması üzrə “MEDSOL” MMC ilə 83.608,9 manat məbləğində satınalma müqaviləsi bağlayıb.

Xəstəxana 22.09.2025-ci ildə isə “MEDSOL” MMC ilə avadanlıqların satınalınması üzrə 79.992,2 manat məbləğində satınalma müqaviləsi bağlayıb.

Yenə sual yaranır. Kim zəmanət verə bilər ki, “MEDSOL” MMC Xəstəxanada dekabrda təmir etdiyi avadanlıqlar sentyabrda satdığı avadanlıqlar deyil?

Qeyd edək ki, “Lənkəran rayon Mərkəzi Xəstəxanası” publik hüquqi şəxsin direktoru Məmmədova Nuridə Rafiq qızıdır. O, daşıdığı vəzifəyə 2025-ci ilin avqustunda TƏBİB-in sabiq icraçı direktoru Vuqar Qurbanovun əmri ilə təyin edilib. Nuridə Məmmədova ondan əvvəl Lənkəran Regional Perinatal Mərkəzin direktoru olub.(aktualinfo.net)

Redaksiyamıza Sumqayıt şəhərinin Üzeyir Hacıbəyov küçəsində piyada yolunun zəbt edilməsi ilə bağlı videogörüntü göndərilib.

Bizimesr.com-a müraciət edən sakinlər bildiriblər ki, ərazidə dəmir konstruksiyadan ibarət tikili quraşdırılıb və artıq obyektin qarşı hissəsi də bağlanaraq piyadaların hərəkəti məhdudlaşdırılıb.

Sakinlərin iddiasına görə, obyekt sahiblərinin bildirdiyinə görə, sözügedən tikiliyə icazənin Sumqayıt şəhər icra başçısı Zakir Fərəcov tərəfindən verilib. Onların fikrincə, əgər bu məlumat doğrudursa, bu halda piyada səkisinin tutulmasına icra başçısı şərait yaradılmış hesab olunur.

Videogörüntülərdə də tikinti işlərinin sürətlə davam etdiyi, dəmir konstruksiyalı artırmanın aparıldığı müşahidə edilir. Bu proses tikinti standartlarının kobud şəkildə pozulması ilə yanaşı, piyada yolunun zəbt olunması sayılır.

Məsələ ilə bağlı qarşı tərəfin mövqeyini öyrənmək mümkün olmayıb. Redaksiya tərəfindən edilən müraciətlər cavabsız qalıb.

Qeyd edək ki, məsələ ilə bağlı rəsmi qurumların mövqeyi açıqlanacağı təqdirdə əlavə məlumat veriləcək.

Bizimesr.com

Bu gün görkəmli oftalmoloq-alim, akademik Zərifə Əliyevanın vəfatından 41 il ötür.

Zərifə Əziz qızı Əliyeva 28 aprel 1923-cü ildə Naxçıvan Muxtar Respublikasının Şərur rayonunun Şahtaxtı kəndində anadan olub.

Atası - görkəmli ictimai və dövlət xadimi Əziz Əliyevin ömür yolu onun üçün əsl həyat məktəbi olub. Zərifə xanım müasir, müstəqil Azərbaycan dövlətinin memarı və qurucusu Ümummilli Lider Heydər Əliyevin ömür-gün yoldaşı, dostu və silahdaşı idi. Vaxtilə ata evində görüb-götürdükləri respublikanın birinci şəxsinin xanımı olduğu zamanlarda köməyinə çatıb. O, Ulu Öndərə mənəvi dayaq, arxa olub.

Akademik Zərifə Əliyevanın tədqiqatları, alim kimi qazandığı böyük uğurlar Azərbaycan tibb elminin tarixində xüsusi mərhələ təşkil edir. O, Azərbaycan Tibb İnstitutunu bitirəndən sonra təhsilini Moskvada, Həkimləri Təkmilləşdirmə İnstitutunda davam etdirib. Əmək fəaliyyətinə 1949-cu ildə Azərbaycan Elmi-Tədqiqat Həkimləri Təkmilləşdirmə İnstitutunda elmi işçi kimi başlayıb və bütün ömrünü tibbin oftalmologiya sahəsinə həsr edib.

1940-1950-ci illərdə Azərbaycanda göz xəstəlikləri, xüsusən traxoma geniş yayılmışdı. İnsanları bu bəladan xilas etmək, eləcə də digər aktual problemə - gözün peşə xəstəliklərinə dair fundamental tədqiqatlar aparmaq, onların effektli müalicə metodlarını və profilaktik tədbirləri işləyib-hazırlamaq lazım idi. Beləliklə, gənc tədqiqatçının elmi araşdırmalarının mövzusunu həyat özü müəyyənləşdirir və o, elmi istiqamətlərinin ilkin mərhələsini traxomanın müalicəsinə həsr edir. Bu xəstəliyin daha geniş yayıldığı rayonlara gedir, xəstəlik ocaqlarını aşkarlayır, göz həkimlərinə mühazirələr oxuyur, əhali arasında söhbətlər aparırdı.

Çox keçmədən Zərifə xanım traxoma xəstəliyinin başlanğıc dövründə sintomisinin tətbiqində uğurlu nəticələrə nail oldu. Tədqiqatlarının yekunu olaraq 1959-cu ildə "Traxomanın digər terapiya üsulları ilə birlikdə sintomisinlə müalicəsi" mövzusunda namizədlik dissertasiyasını uğurla müdafiə etdi. Onun təklif etdiyi müalicə metodu respublikamızda geniş tətbiq olundu və traxomanın bir xəstəlik kimi aradan qalxmasında mühüm rol oynadı.

Zərifə xanımın oftalmoloq-alim kimi diqqət yetirdiyi aktual problemlər sırasında diaqnostika, qlaukomanın və görmə orqanının iltihabının müalicəsi xüsusi yer tuturdu. O, oftalmologiyanın elmi cəhətdən az araşdırılmış sahəsi - görmə orqanının peşə patologiyasını dərindən tədqiq edib. Bu problemin aktuallığı yalnız kimya və elektronika sənayesinin geniş inkişafı ilə deyil, həm də bir çox yeni kimyəvi birləşmələrin görmə orqanına təsirinin tədqiqi ilə əlaqədar idi. Zərifə xanım bu sahənin ilk tədqiqatçısı olub. O, dünyada ilk dəfə olaraq görmə orqanının peşə patologiyasını araşdıran elmi-tədqiqat laboratoriyası yaradıb və elm aləmində yeni bir istiqamətin - peşə oftalmologiyasının əsasını qoyub. Bu sahəyə dair araşdırmalarının ilkin nəticələrini ümumiləşdirərək "Azərbaycanın kimya sənayesi işçilərində görmə orqanının vəziyyəti" mövzusunda doktorluq dissertasiyası yazıb. 1977-ci ildə ona tibb elmləri doktoru alimlik dərəcəsi verilib.

Gərgin və məhsuldar elmi fəaliyyətinə görə 1980-ci ildə "Əməkdar elm xadimi" fəxri adına layiq görülüb. Görkəmli alimin respublikanın iri sənaye müəssisələrində apardığı genişmiqyaslı elmi-tədqiqat işləri "Şin istehsalında gözün peşə patologiyası", "Xroniki yod intoksikasiyası zamanı oftalmologiya" və "Yod sənayesində gözün peşə xəstəliyinin profilaktikası" kimi dəyərli monoqrafiyalarında əksini tapıb. 1981-ci ildə görmə orqanının peşə patologiyası sahəsində apardığı elmi-tədqiqat işlərinin uğurlu nəticələrinə və oftalmologiyanın inkişafına töhfələrə görə ona keçmiş ittifaqın oftalmologiya sahəsində ən mötəbər mükafatı olan SSRİ Tibb Elmləri Akademiyasının M.İ.Averbax adına mükafatı verilib. O, həmin mükafata layiq görülən ilk qadın alim idi.

Zərifə Əliyeva 1983-cü ildə Azərbaycan Elmlər Akademiyasının həqiqi üzvü seçilib. O, həmçinin bir sıra dərs vəsaiti və monoqrafiyaların müəllifidir: "Kəskin virus konyunktivitləri", "Keratitlər, gözün damarlı traktının, torlu qişanın, görmə sinirinin xəstəlikləri, kataraktalar", "Qlaukoma və gözün hipertenziyası", "Görmə orqanının zədələnməsi", "Göz yaşı axmasının fiziologiya və histologiyası", "Şəkərli diabetdə göz xəstəlikləri", "Gözün mikrocərrahiyyəsi", "Göz bəbəyi haşiyəsinin adaptasiya və müdafiə funksiyası" və sair. Alimin "Yaşaparıcı yolların fiziologiyası", "Yaşaparıcı yolların cərrahi müalicəsi", "Göz yaşı yollarının qoruyucu cərrahiyyə üsulları" və digər əsərləri bu gün də aktuallığını qoruyub saxlayır. O, iridodiaqnostika və iridoterapiya problemləri ilə də məşğul olub, bu sahəyə dair iki monoqrafiya hazırlayıb. Dünya miqyasında iridodiaqnostikaya aid kitabları ilk dəfə Zərifə Əliyeva yazıb.

Zərifə Əliyevanın həkimlik sənəti ilə bağlı bir fikri də diqqəti cəlb edir: "Həkim insanın ən doğma adamıdır. O, insanlardan özünü ayırmamalı, özünü sevən, laqeyd insan olmamalıdır".

Akademik Zərifə Əliyeva həm də görkəmli ictimai xadim idi. O, keçmiş SSRİ Sülhü Müdafiə Komitəsinin üzvü, Azərbaycan Sülhü Müdafiə Komitəsi sədrinin müavini, Ümumittifaq "Bilik" Cəmiyyəti İdarə Heyətinin, Ümumittifaq Oftalmoloqlar Elmi Cəmiyyəti Rəyasət Heyətinin üzvü olub. Xalq yazıçısı Elmira Axundovanın "Zərifə və Heydər Əliyevlər - Əbədiyaşar məhəbbət" kitabında oxuyuruq: "Özü də çoxsaylı vəzifələrinin heç birinə qətiyyən formal yanaşmırdı. Məsələlərin müzakirəsində şəxsən iştirak edir, onların uğurlu həlli üçün bilik, qüvvə və enerjisini əsirgəmirdi.

Bu zaman çalışırdı ki, gündəlik həyatının işlə bağlı tərəfi heç bir halda qadın və ana kimi üzərinə düşən vəzifələri üstələməsin. Bəzən Zərifə xanım elmi və ictimai işlərin ailəsinə, övladlarına ayıra biləcəyi vaxtı əlindən aldığına görə özünü günahkar hiss edirdi".

Zərifə Əliyevanın fəxri adları, elmi titulları, mükafatları olduqca çoxdur. Bu adların hər biri qürur, iftixar mənbəyidir. Amma bu adlar sırasında ən şərəflisi Ana adıdır. Zərifə xanım Ümummilli Lider Heydər Əliyevin siyasi xəttinin layiqli davamçısı Prezident İlham Əliyevin anasıdır.

O, 1985-ci il aprelin 15-də Moskva şəhərində vəfat edib.

Azərbaycan Milli Elmlər Akademiyası (AMEA) 2026-cı ildə keçirilməsi planlaşdırılan elmi tədbirlərin təşkili və müvafiq xidmətlərin satın alınması üçün tender elan edib.

Akademiyanın elmi konfranslarının yüksək səviyyədə keçirilməsi məqsədilə ayrılan vəsaitin ehtimal olunan qiyməti 169 977,82 AZN təşkil edir.

Satınalma predmetinə əsasən, konfrans iştirakçıları üçün nəzərdə tutulan dəvətnamələrin, xüsusi dizaynlı qovluqların, bloknot və proqramların çapı, habelə yazı ləvazimatlarının təminatı planın əsas hissəsini təşkil edir. Siyahıda təkcə kargüzarlıq malları deyil, həm də tədbirlərin vizual yaddaşda qalması üçün peşəkar HD formatlı video və foto çəkiliş xidmətləri də yer alıb. Maraqlıdır ki, texnoloji dövrün tələblərinə baxmayaraq, video çəkilişlərin hələ də DVD disklərdə və qutularda təhvil verilməsi şərt kimi irəli sürülüb.

Tədbirlərin iaşə xidmətləri hissəsində isə “Coffee break”, nahar və şam yeməklərinin təşkili üçün detallı tələblər müəyyən edilib. Menyuya milli və türk paxlavasından tutmuş, müxtəlif növ şirniyyatlara qədər geniş çeşid daxil edilib. Şam yeməyinin AMEA-nın əsas binasına yaxın restoranlarda, “milli kolorit” və “hər növ içki” təminatı ilə keçirilməsi nəzərdə tutulur. Elmi qurumun təşkilati işlərə ayırdığı bu büdcə, akademiyanın elmi fəaliyyətdən daha çox təmsilçilik və logistik xərclərə fokuslanması kimi dəyərləndirilə bilər.

Qeyd edək ki, Azərbaycan Milli Elmlər Akademiyasının (AMEA) hazırkı rəhbəri (prezidenti) akademik İsa Həbibbəylidir. 32gun.az

Cəlilabad rayon icra hakimiyyətinin başçısı Rafiq Cəlilovdan rayonda yaşayan qazilər və şəhid ailələri narazıdır. Vətəninfo.az xəbər verir ki, Birinci Qarabağ müharibəsi qazisi Asəf İsmayılov sosial şəbəkə hesabından videomüraciət yayaraq ölkə başçısı İlham Əliyevdən kömək istəyib. Asəf İsmayılov yaydığı videoda rayon icra başçısının yaşadığı küçəyə yeni asfalt örtüyünün çəkildiyini bildirərək qazilərə bu münasibətin olmadığını qeyd edib.

Asəf İsmayılov bildirib ki, Qarabağ döyüşlərində qazi olan, həmçinin şəhid ailələrinin yaşadığı binanın qarşısı keçilməzdir. Şəhid ailələri və qazilər bir neçə dəfə bununla bağlı icra başçısına müracət etsələr də, onların şikayətlərinə baxan yoxdur.

Qeyd edək ki, iddialara görə rayonda yaşayan qazilər, şəhid ailələri problemləri ilə bağlı icra başçısının qəbuluna düşməkdə çətinlik çəkirlər. Vətən müharibəsi iştirakçılarının və qazilərin müxtəlif sosial, məişət və səhiyyə problemləri ilə bağlı müraciətlərinə lazımi diqqətin göstərilmir.
Qeyd edək ki, Azərbaycanda şəhid ailələrinə və qazilərə göstərilən diqqət dövlət siyasətinin prioritet istiqamətlərindən biridir. Prezident İlham Əliyev dəfələrlə öz çıxışlarında bu kateqoriyadan olan vətəndaşlara xüsusi həssaslıqla yanaşılmasının vacibliyini vurğulayıb. Bu səbəbdən də, icra başçısı kimi yüksək vəzifəli şəxsin qazilərə qarşı hörmətsizlik etməsi dövlətimizin apardığı siyasətə ziddir.
Vətəndaşlar icra strukturlarından, xüsusilə də yerli icra hakimiyyəti orqanlarından qazilərin hər cür probleminə operativ və həssas yanaşma gözləyirlər. Onlar hesab edirlər ki, qazilərə göstərilən hörmət, onların müraciətlərinə diqqətli yanaşma dövlətimizin onlara verdiyi dəyərin təzahürü olmalıdır.(Vətəninfo.az)
Qarşı tərəfin mövqeyinin dərc etməyə hazırıq.

"Narazılığım “Pilgrim Education” şirkəti ilə bağlıdır". "DİA-AZ" xəbər verir ki, bunu özünün etiraz dolu müraciətində Nəcmə Abdullayeva adlı sosial şəbəkə istifadəçisi yazır.

Narazı vətəndaş daha sonra başına gələnləri belə nəql edir: "Xaricdə təhsil adı ilə insanlardan yüksək məbləğdə ödəniş alırlar, lakin sonradan heç bir real xidmət göstərmirlər. Mən bu şirkətə 3000 manat ödəniş etmişəm. Üzərindən artıq 1 ildən çox vaxt keçib, amma nə sənəd işi görülüb, nə də hər hansı konkret nəticə var.

Dəfələrlə əlaqə saxlamağa çalışsam da, ya cavab verilmir, ya da məsələ müxtəlif bəhanələrlə uzadılır.

Mediada da bu şirkətlə bağlı şikayətlər yayımlanıb. Düşünürəm ki, tək deyiləm.

Xahiş edirəm, bu vəziyyətlə qarşılaşan başqa şəxslər varsa, birlikdə vəziyyəti araşdıraq və lazım gələrsə, hüquqi addım atardıq..."

DİA-AZ

Səhiyyə Nazirliyinin Analitik Ekspertiza Mərkəzi özəl tibb mərkəzi kimi fəaliyyət göstərən “NNC KLİNİKA” MMC-yə məxsus klinikada yoxlama keçirib.

Xalq-ın əldə etdiyi məlumata görə, yoxlama zamanı klinikada həkim lisenziyası olmayan şəxslərin həkim fəaliyyəti ilə məşğul olduqları üzə çıxıb. Qanun pozuntusu ilə bağlı klinikanın fəaliyyəti dayandırılıb.

Nazirliyin Analitik Ekspertiza Mərkəzindən sorğumuza cavab olaraq məlumatı təsdiq ediblər. Qeyd edilib ki, sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” Azərbaycan Respublikasının Qanunun 16-cı və 17-ci maddələrinə müvafiq olaraq Bakı şəhəri Nərimanov rayonu Əliyar Əliyev 41 ünvanda yerləşən “NNS KLİNİKA” MMC-yə məxsus özəl tibb müəssisəsində Səhiyyə Nazirliyinin Analitik Ekspertiza Mərkəzi tərəfindən 6-7 aprel tarixlərində plandankənar (növbədənkənar) yoxlama keçirilib: “Xidməti yoxlama zamanı lisenziya olmadan tibb fəaliyyəti və qeydiyyatsız dərman vasitəsindən istifadə faktı aşkar edildiyindən hüquqi şəxs barəsində inzibati tənbeh tədbiri seçilərək, inzibati xətalar məcəlləsin 210.1 və 221.1 maddələri ilə inzibati xəta haqqında protokol tərtib edilib və aidiyyəti üzrə növbəti icraata göndərilib.

Əlavə olaraq “NNS KLİNİKA” MMC-yə məxsus özəl tibb müəssisəsinin cari fəaliyyətinin dayandırılması üzrə hüquq-mühafizə orqanları qarşısında vəsatətin qaldırılması məqsədilə təqdimat təqdim edilib.

Cari əmək fəaliyyəti üzrə ixtisasına uyğun vəzifənin müəyyən edilməsi məqsədilə Səhiyyə Nazirliyinin Analitik Ekspertiza Mərkəzindən Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinə rəsmi müraciət ünvanlanıb”.(Xalq.online)