Azərbaycanda iri həcmli dövlət satınalmalarının aktiv qaliblərindən biri də «Hovers Group» MMC-dir (VÖEN: 1501843641).

Şirkət 2011-ci ildə yaradılsa da, 2024-cü ildən etibarən tenderlərin qalibi olur.

Beləliklə, «Hovers Group» MMC bu il 2 dövlət qurumu ilə 50 milyon 553,8 min manatlıq satınalma müqaviləsi imzalayıb. “Tikilməkdə olan Obyektlərin Müdiriyyəti” PHŞ Zərdab rayonunun Dəkkoba kəndinin əkin sahələrinin su təminatının yaxşılaşdırılması tədbirlərini bu şirkətə tapşırıb və 9 milyon 287,3 min manatlıq satınalma müqaviləsi imzalayıb.

“Laçın Rayonunda Bərpa, Tikinti və İdarəetmə Xidməti" PHŞ də Laçın şəhərində yeni yaşayış məhəlləsinin tikintisinin təşkili ilə bağlı şirkətə 41 milyon 266,4 min manatlıq sifariş verib.

Ümumiyyətlə, «Hovers Group» MMC "Tikilməkdə olan Obyektlərin Müdiriyyəti" PHŞ-nin sevimli şirkətidir. Qurum 2025-ci ildə bu şirkətə 53 milyon 956,1 min manatlıq işlər gördürüb.

Bundan başqa, şirkət 2025-ci ildə Ədliyyə Nazirliyinin Pentensiar Xidmətindən 230,4 min manatlıq, "Su Meliorasiya Xidməti" PHŞ-dən 28 milyon 740 min manatlıq sifariş alıb.

2024-cü ildə isə Naxçıvan Muxtar Respublikası Dövlət Su Ehtiyatları Agentliyi ilə şirkət arasında 12 milyon 430 min manatlıq, Məcburi Köçkünlərin Sosial İnkişafı Fondu ilə şirkət arasında 13 milyon 818,8 min manatlıq satınalma müqavilələri imzalanıb.

Ümumi olaraq, «Hovers Group» MMC 8 müxtəlif dövlət qurumundan 159 milyon 689,1 min manatlıq sifariş alıb.

Şirkətin qalibi olduğu tenderlər daha ətraflı:

Bizimesr.media

Sosial şəbəkələrdə Yasamal rayonunda yerləşən 167 saylı orta məktəbdə təmir işləri adı altında valideynlərdən pul toplanması ilə bağlı məlumat yayılıb.

Bizimesr.media bildirir ki, yayılan məlumatda iddia olunur ki, məktəbdə bütün valideynlərdən təmir üçün pul vermələri tələb edilib. Bildirilir ki, hər sinif üzrə toplanan məbləğ təxminən 200 manat təşkil edir.

Məlumatın nə dərəcədə doğru olduğu və vəsaitin hansı məqsədlə toplandığı açıqlanmır. Məsələ ilə bağlı aidiyyəti qurumların mövqeyini öyrənməyə çalışacağıq.

Qeyd edək ki, 167 saylı orta məktəbin direktoru Taleh Quliyevdir. O 2023-cü ildə bu posta təyin olunub.

Bir neçə gün əvvəl DİM rəhbərliyinin dəyişdiriləcəyi və Məleykə Abbaszadənin yerinə ADNSU-nun rektoru Rüfət Əzizovun gətiriləcəyi barədə xəbər yayılmışdı.
Həmin xəbərdə Abbaszadənin yaşı nəzərə alınaraq pensiyaya göndəriləcəyi qeyd edilmişdi. Təyinatın yaxın günlərdə reallaşacağı vurğulanırdı.
Qeyd edək ki, bu məlumat sosial şəbəkələrdə müzakirələrə səbəb olub. Belə ki, sosial şəbəkə fəallarından olan və vaxtilə Təhsil İnstitutunda çalışmış Könül Aydın Rüfət Əzizov haqqında iddialar səsləndirib.
Onun iddiasına görə, DİM-in rəhbərliyinə gətirilməsi gözlənilən Əzizovun Fətullah Gülənlə əlaqəsi var: “Amandır, etməyin. Bir ölkəyə zərrəcə hörmətiniz varsa, etməyin. Bu gəlsə, ölkəni Fətullah Gülənin şəbəkəsi tamamilə idarə edəcək. Mətaha da döndərməyin, adi bir korrupsionerdir”.
Könül Aydın özünün sosial şəbəkə hesabında yazıb ki, Əzizov Təhsil İnstitutunda direktor olduğu müddətdə MİQ imtahanları tamamilə hazırlıq kursları idarəçilərinin əlinə keçdi: “Rüfət Əzizov Təhsil İnstitutuna direktor təyin ediləndə mən həmin institutda Əlavə təhsilin məzmunu şöbəsinin müdiri idim. MİQ imtahanının aparılmasında iştirak edirdim. Həmin il gördüm ki, çöldə nə qədər tanınmış kurs var, hamısının məsul işçiləri bunkerdədirlər, imtahan testlərini hazırlayırlar. İmtahandan sonra Şamaxıya dincəlməyə getdik. Onda elə o kurs adamlarının önündə Rüfət Əzizova dedim ki, bu bazar adamları niyə imtahan suallarını yazırlar? Mən bu instituta gələndə məni inandırmışdılar ki, biz təhsili korrupsiyadan təmizləmək üçün gəlmişik, mən də burada şöbə müdiri olmağa razılıq vermişdim. Fəaliyyətim müddətində köhnə korrupsionerlərə qarşı sərt idim, onlar tələblərimə dözməyib ya işdən gedir, ya da yaramazları özüm işdən çıxarırdım. Belə çıxır ki, mən o köhnə korrupsionerlərin günahına batmışam. Nə fərqi vardı – o korrupsionerlər, yoxsa bu bazar adamları?”
Təhsil İnstitutunun keçmiş əməkdaşı daha sonra bildirib ki, bu çıxışı zamanı Rüfət Əzizov “lal və kar” kimi susub, bir kəlmə də cavab verə bilməyib: “Nəzakət Mehtiyeva oturduğu yerdə ölmüş, Nurlan İsmayılbəyli başı ilə sözlərimi təsdiq edirdi. Bu hadisəni burada çox adam xatırlayar. Böyük kollektiv qarşısında çıxış etmişdim. Nəzakət Mehtiyeva Şamaxıdakı bu toplantıdan öncə – Bakıda öz iş otağında mənə kurs rəhbərlərinin MİQ imtahanında iştiraklarını belə əsaslandırmışdı: “Onlar çöldə qalanda müəllimləri üstümüzə qaldırıb ETN qarşısında aksiya keçirir, “Facebook”-da paylaşmalar edərək ajiotaj yaradırlar”. Hətta demişdi ki, iki kurs rəhbərini bu təxribata görə otağına çağırmışdı, onlar da onun gözü önündə bir-birlərini pis söyüşlərlə təhqir edərək bir-birlərinin üzlərinə tüpürmüşdülər. Ona görə də ikisi də indi bunkerdə idilər”.
Könül Aydın daha sonra yazıb ki, həmin dönəmdən bəri imtahandan sonra səs çıxmır: “Diqqət edin, artıq neçə ildir, görün imtahandan sonra səs çıxırmı?! Demək, elə o vaxtdan MİQ kurslar arasında bölüşdürülüb. Bütün kurslar böyük güclərə məxsusdur. Allah qorusun, onlar mənə bir daha nəsə etmək istəyərlər. Biləsiniz. Baxın da”.
O, yekunda Əzizov haqqında başqa məlumatlar da paylaşıb. Könül Aydın yazıb: “AGMA Rüfət Əzizovun idarəçiliyindən niyə alındı? Rüfət Əsədzadə niyə ölkədən qaçdı? Dövlət qurumları araşdırsınlar. Rüfət Əsədzadə bir trol qrupunu da idarə edirdi. Bu axmaqlar məni də oraya daxil edib vəzifə və yüksək məbləğdə xidmət haqqı təklif edirdilər. Görün nə qədər səfeh və beyin yerində hörümçək toru – Fətullah Gülənin şəbəkə siyasəti olan adamdırlar ki, hamını özləri kimi zənn edirlər. Qrupdan çıxıb nümayəndələrinə dedim ki, get, mənim adımdan bunların üzünə tüpür.
Bu biabırçılıqlar gözümüzün önündə baş verdi. Ürəyimiz bulanır. Belə təbliğatlar aparmayın, xahiş edirik. Korrupsionerlərin, merkantil şəbəkənin, təriqət adamlarının bir qurumu lokal olaraq idarə etməsinə birtəhər dözürük, övladlarımızın gələcək dünyasını tamamilə verməyin bunların əlinə!
Bununla işləyib tanımışam, əminliklə yazıram”.
Məsələ ilə bağlı yazıda adı keçən şəxslərin də mövqeyini dərc etməyə hazırıq.
NOCOMMENT.az

"Kəlbəcərin Zar kəndində tikinti ilə bağlı ciddi suallar var..." "DİA-AZ" xəbər verir ki, bu iddianı səsləndirən əslən Kəlbəcər rayonundan olan tanınmış şair Səxavət Kəlbəcərli eyni zamanda fotodəlil də təqdim edib.
Beləliklə aşağıdakı fotonu təqdim edən kəlbəcərli şair fikrini belə davam etdirir:

"Bu şəkil Kəlbəcərin Zar kəndində çəkilib. Yeni yaşayış məntəqəsinin tikintisində belə bir mənzərənin ortaya çıxması məni, bir kənd sakini kimi, ciddi narahat edir.
Cənab prezident İlham Əliyevin göstərişi ilə Zar kəndinin qurulmasına böyük vəsait ayrılıb. Lakin ayrılan vəsaitlərin təyinatı üzrə xərclənməsi və tikinti işlərinin keyfiyyəti ilə bağlı ciddi suallar yaranır.
Şəkildə divarın hörgüsünə diqqət yetirin: kubiklərin arasındakı bir çox hissəyə sement məhlulu belə düzgün vurulmayıb. Kubiklər arasında boşluqlar görünür və hörgünün keyfiyyəti ciddi şübhə doğurur. Dövlət vəsaiti hesabına tikilən yaşayış evində belə işin görülməsi yolverilməzdir.

Mənim iddiam ondan ibarətdir ki, “Amozon” şirkətinin həyata keçirdiyi işlərdə ayrılmış vəsaitlərin səmərəli xərclənməsi, qiymətlərin formalaşdırılması və tikinti keyfiyyəti ciddi şəkildə yoxlanılmalıdır. Əgər dövlət büdcəsindən ayrılan vəsait mənimsənilibsə və ya işlərin həcmi və qiyməti süni şəkildə dəyişdirilibsə, bunun hüquqi qiyməti verilməlidir.
Digər tərəfdən, mən həmin kəndin sakini olduğum halda, tikinti zamanı qanunsuz şəkildə işdən çıxarılmağımı da diqqətə çatdırıram. İşçilərin əmək şəraiti və tikintidə gördüyüm problemlərlə bağlı etiraz etdiyim üçün işdən çıxarıldığımı düşünürəm və bunun da araşdırılmasını istəyirəm.
Mən heç kəsi məhkəmə qərarı olmadan günahkar elan etmirəm. Sadəcə olaraq Prezidentin ayırdığı dövlət vəsaitinin hara xərcləndiyini, tikilən evlərin hansı standartlarla qəbul edildiyini və “Amozon” şirkətinin fəaliyyətinin qanuniliyini araşdırmağı tələb edirəm.
Zar kəndi bizim doğma kəndimizdir. Dövlət vəsaiti hesabına tikilən evlər keyfiyyətli və təhlükəsiz olmalıdır. Bu məsələyə aidiyyəti qurumların ciddi münasibət göstərməsini və obyektiv araşdırma aparmasını xahiş edirəm..."
"DİA-AZ " qeyd edir ki, Zar kəndinin inşaası Azərbaycanın rəqəmsal inkişaf və nəqliyyat nazirinin müavini Cavid Qurbanovun nəzarəti altında həyata keçirilir.
Hətta kənddə fəaliyyət göstərəcək ticarət mərkəzi, habelə digər ticarət və iaşə obyektləri belə indidən Cavid Qurbanovun adamları arasında pay-püş edilməkdədir. Görünəni odur ki, cənab Qurbanovu Zar kəndinin sakinlərinin hansı evlərə köçəcəyi yox gələcəkdə sahib olacağı əlavə qazanc daha çox maraqlandırır...(DİA-AZ)

Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsi tərəfindən keçirilmiş təhsil müəssisələrinin tədris laboratoriyaları və STEAM istiqamətli mərkəzlər üçün avadanlıqların satınalınması” (Müsabiqə İN: 2026/AT/02733/V2) ilə bağlı müsabiqə yyekunlaşıb. “SİMPLEX” QAPALI SƏHMDAR CƏMİYYƏTİ , “MÜHƏNDİSLİK TİKİNTİ TƏCHİZAT” Məhdud Məsuliyyətli Cəmiyyəti, “RAMMA” QAPALI SƏHMDAR CƏMİYYƏTİ və “ROBOTZADE ROBOT TEKNOLOJİLERİ ELEKTRONİK SANAYİ VE DIŞ TİCARET LİMİTED ŞİRKETİ”NİN AZƏRBAYCAN RESPUBLİKASINDAKI FİLİALI “Dövlət satınalmaları haqqında” Azərbaycan Respublikasının Qanununun 35.1.1-ci maddəsinə əsaslanaraq təchizatçı və (və ya) subpodratçı uyğunluq göstəricilərinə cavab vermədiyi üçün müsabiqədən kənarlaşmışdır. “VIVA MEDICAL GROUP” Məhdud Məsuliyyətli Cəmiyyəti qalib elan olunmuş və həmin təchizatçı ilə 7.014.392,79 manat məbləğində satınalma müqaviləsinin bağlanması nəzərdə tutulub. Məlumat satınalmaların portalında 01.09.2026-cı ildə dərc edilib.

Qeyd edək ki, Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsinin tədris laboratoriyaları və STEAM istiqamətli mərkəzlər üçün avadanlıqların satınalınması üzrə keçirdiyi tenderlər son günlər medianın müzakirə mövzusuna çevrilib. Aktuallığını nəzərə alıb mövzu ətrafında daha ətraflı araşdırma apardıq.

STEAM əsaslı tədrisin təşkili üzrə xidmətlərin satınalınması üzrə 1.186.100 manat dəyərində müqavilə bir mənbədən satınalma metodu ilə “Təhsildə İnnovativ Texnologiyalar Əlavə Təhsil Mərkəzi MMC ilə 12.12.2025-ci ildə bağlanılıb.

Tədris laboratoriyaları və STEAM istiqamətli mərkəzlər üçün avadanlıqların satınalınması üzrə 9.950.083,95 manat dəyərində müqavilə “VIVA MEDICAL GROUP” MMC ilə 06.10.2025-ci ildə bağlanılıb.

Tədris laboratoriyaları və STEAM avadanlıqlarının satınalınması üzrə 7.970.094,74 manat dəyərində müqavilə “JBA GROUP” Məhdud Məsuliyyətli Cəmiyyəti ilə 17.12.2024-cü ildə bağlanılıb.

STEAM istiqamətli mərkəzlər üçün avadanlıqların satınalınması üzrə 3.563.854,46 manat dəyərində müqavilə “JBA GROUP” Məhdud Məsuliyyətli Cəmiyyəti ilə 12.12.2024-cü ildə bağlanılıb.

Kimya, fizika, biologiya laboratoriyalarının və STEAM istiqamətli avadanlıqların satınalınması üzrə 13.647.698,72 manat dəyərində müqavilə “Tikinti-Təmir-Təchizat-Bərpa” QSC ilə 28.12.2023-cü ildə bağlanılıb.

STEAM əsaslı tədrisin təşkili işlərinin satınalınması üzrə 1.982.400 manat dəyərində müqavilə bir mənbədən satınalma metodu ilə “Təhsildə İnnovativ Texnologiyalar Əlavə Təhsil Mərkəzi MMC ilə 06.11.2023 -cü ildə bağlanılıb.

STEAM avadanlıqlarının satınalınması üzrə bir müqavilə də 09.12.2022-ci ildə Elm və Təhsil Nazirliyi nəzdində Təhsil Sisteminin İnformasiyalaşdırılması İdarəsi ilə “EDUMEDİA-AZƏRBAYCAN” MMC ilə bağlanılıb. Bu müqacilənin dəyəri 1.822.043,9 manat olub.

Göründüyü kimi son 4 ildə Elm və Təhsil Nazirliyi STEAM avadanlıqlarının alınmasına 43 938 164 manat, STEAM əsaslı tədrisin təşkili işlərinin satınalınmasına isə 3 168 500 manat vəsait ayırıb.

Maraqlıdır, Elm və Təhsil Nazirliyinə tabeli qurumlardan milyonlarla manat dəyərində tenderlər udan şirkətlər kimə məxsusdur və barələrində nə kimi məlumatlar var.

Dövlət Vergi Xidmətinin kommersiya qurumunun hüquqi şəxslərin dövlət reyestrinə daxil edilmiş məlumatlarında “TƏHSİLDƏ İNNOVATİV TEXNOLOGİYALAR ƏLAVƏ TƏHSİL MƏRKƏZİ” (VÖEN: 1402405651 )Məhdud Məsuliyyətli Cəmiyyətinin 30.08.2012-ci il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 100 manat olan MMC-nin hüquqi ünvanının BAKI ŞƏHƏRİ NƏSİMİ RAYONU, HÜSEYNBALA ƏLİYEV, ev 4, m. 105, qanuni təmsilçisi kimi isə Axundov Emin Əlövsət oğlu qeyd olunub.
Qeyd edək ki, reyestrinə daxil edilmiş məlumatlarda dəyişikliklərin tarixçəsində MMC-nin Xanlarov Vüsal Tərlan oğlu tərəfindən təsis edildiyi göstərilir. Bəs Vüsal Xanlarov kimdir? Təhsil Nazirliyi Təhsil Sisteminin İnformasiyalaşdırılması İdarəsinin rəisi. Qeyd edək ki, o bu vəzifəyə 2018-ci iln fevralından təyin edilib.

STEAM avadanlıqlarının satınalınması üzrə qalib olan şirkətlərə gəlincə.

Dövlət Vergi Xidmətinin kommersiya qurumunun hüquqi şəxslərin dövlət reyestrinə daxil edilmiş məlumatlarında “JBA GROUP” (VÖEN: 1305276401 )Məhdud Məsuliyyətli Cəmiyyətinin 20.11.2017-ci il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 100 manat olan MMC-nin hüquqi ünvanının BAKI ŞƏHƏRİ NƏSİMİ RAYONU, ƏBDÜLVAHAB SALAMZADƏ, ev.112A, m.76, qanuni təmsilçisi kimi isə Süleymanov Süleyman Məmməd oğlu qeyd olunub. Şirkətin təsisçisi və qanuni təmsilçisi Bəxtiyar Əsədov Ağali oğlu olub.

Medianın son günlər yaydığı məlumatlara görə Elm və Təhsil naziri Emin Əmrullayevin qaynı Nihad Hənifəyevə aid olan “İSTEAM” MMC-nin STEAM avadanlıqlarının təchizatında “JBA GROUP” MMC-nin əsas rol oynadığı vurğulanır.

Göründüyü kimi Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsinin qalib seçdiyi şirkətlər dolayısı ilə Elm və Təhsil naziri Emin Əmrullayevin yaxın çevrəsinə aiddir. Demək olar ki, sözügedən qurumun təşkil etdiyi satınalmalarda eyni şirkətlər gah qalib çıxır, gah da kənarlaşdırılır.

Elə Təsərrüfat Hesabli Əsasli Tikinti Və Təchizat İdarəsinin təhsil müəssisələrinin tədris laboratoriyaları və STEAM istiqamətli mərkəzlər üçün avadanlıqların satınalınması ilə bağlı müsabiqədə olduğu kimi. Müsabiqədən kənarlaşdırılan “SİMPLEX” Qapalı Səhmdar Cəmiyyəti, “MÜHƏNDİSLİK TİKİNTİ TƏCHİZAT” Məhdud Məsuliyyətli Cəmiyyəti, “RAMMA” Qapalı Səhmdar Cəmiyyəti dəfələrlə Təsərrüfat Hesabli Əsasli Tikinti Və Təchizat İdarəsinin keçirdiyi satınalmaların qalibi olublar.

Göründüyü kimi, Əsasli Tikinti Və Təchizat İdarəsinin Satınalma Komissiyası təchizatçıların sayının üç olması, yetərsay olması üçün “SİMPLEX” QSC, “MÜHƏNDİSLİK TİKİNTİ TƏCHİZAT” MMC, “RAMMA” QSC -ni formal olaraq satınalmaya cəlb etmiş, “uyğunluq göstəricilərinə” cavab vermədiyinə görə müsabiqədən kənarlaşdırmağı qərara almışlar. Halbuki Təsərrüfat Hesabli Əsasli Tikinti Və Təchizat İdarəsi keçirdiyi satınalmalarda sözügedən şirkətləri dəfələrlə qalibi seçib, milyonlarla manat dövlət vəsaitini naməlum istiqamətə yönləndiriblər.

Qeyd edək ki, Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsinin rəisi Valeh Mirzaliyevdir. O, 2022-ci ilin mart ayından İdarəyə rəhbərlik edir. Daha əvvəllər Elm və Təhsil Nazirliyinin Təhsil Texnologiyaları Mərkəzinin direktoru, Peşə Təhsili üzrə Dövlət Agentliyində direktoru vəzifələrində çalışıb.

Medianın yaydığı məlumatlara görə nazir Emin Əmrullayevin sinif yoldaşı olub. yaxın çevrəsinə aid olan şəxslərdəndir. Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsi tərəfindən təhsil müəssisələrinin tədris laboratoriyaları və STEAM istiqamətli mərkəzlər üçün avadanlıqların alınması üzrə keçirilmiş satınalmalarda adları keçən Nihad Hənifəyev isə Elm və Təhsil naziri Emin Əmrullayevin qaynıdır. Qrup daxilində satınalma və inzibati zəncirin digər idarəedici halqasının mərkəzində dayanan şəxs Zamiq Əlövsət oğlu Məmmədov da nazir Emin Əmrullayevin sinif yoldaşı oldduğu barədə məlumatlar yayılıb.

Aktualinfo.net

General polkovnik Vilayət Eyvazova “Sahil S-İnşaat” MTK sakinləri tərəfindən müraciət ünvanlanıb. Müraciətdə deyilir:

"Cənab nazir, Bakının Suraxanı rayonu, Yeni Günəşli qəsəbəsi A-B massivində yerləşən “Sahil-S İnşaat” MTK-nın sakinləri olaraq Sizə müraciət etməyimizdə səbəb 165 ailənin üzləşdiyi problemdir.
İlk növbədə qeyd etmək istəyirik ki, MTK rəhbərliyi tərəfindən mülkiyyət hüquqlarımız pozulub və biz illərlə apardığımız hüquqi mübarizə çərçivəsində və dövlətin dəstəyi ilə bir çox problemlərimizi geridə qoymuşuq.
Belə ki, MTK rəhbəri olmuş Taley Alaverdiyev və şəriki Pənah Kərimovun bir mənzili bir neçə vətəndaşa satması nəticəsində hər iki şəxs dələduzluğa görə həbs olunub. Artıq istintaq və məhkəmə yekunlaşıb, dələduzluğa yol vermiş şəxslərə hökm oxunub. Lakin həmin müddət ərzində biz zərər çəkən sakinlər öz maliyyə resurslarımız, min bir zəhmət və banklardan götürdüyümüz kreditlər hesabına binanın yarımçıq qalan tikintisini yekunlaşdırmışıq ki, illərlə gözlədiyimiz mənzillərimizdə yaşaya bilək.
Bununla bağlı deməliyik ki, tikinti tamamlanıb, liftlər quraşdırılıb, ən əsası isə hörmətli Mehriban xanım Əliyevanın tapşırığı və dəstəyi ilə binada kommunal təchizat təmin edilib. Hazırda binanın daimi qazı, suyu, işığı var. Bu işlərdə Baş Prokurorluq yanında Korrupsiya ilə Mübarizə Baş İdarəsinin uzun müddət bizə göstərdiyi xüsusi diqqəti və dəstəyi vurğulamaq lazımdır.
Cənab nazir, hazırda həllini gözləyən yeganə problemimiz mənzillərə Çıxarış ala bilməməyimizdir. Bunun da səbəbi MTK-da rəhbərliyin həbsdəki Taley Alaverdiyevdən müəmmalı şəkildə Abuzərov Rusif Lətif oğlu ad-soyadlı şəxsə keçməsidir.
Bildirək ki, bu şəxs ortalıqda yoxdur və Suraxanı rayon İcra Şöbəsinin böyük icra məmuru Rəşad Dövlətov tərəfindən onun barəsində borclu hüquqi şəxsin rəhbəri kimi işini yerinə yetirməməsinə görə axtarış elan olunub. Qərarın icra edilməsi üçün Ucar rayon Polis Şöbəsinə göndərilməsi qərara alınıb.
Bu şəxsin tapılıb məsuliyyətə cəlb olunması və mənzillərə Çıxarış verilməsi üçün onun istismar aktına imza atması lazımdır. Barəsində axtarış verilmiş Abuzərov Rusif Lətif oğlunun ucbatından binanın istismara götürülməsi, biz sakinlərin mənzillərimizə Çıxarış alması mümkün olmur. Eyni zamanda, binada mənzilinin alıq-satqısını edə bilməyən sakinlər var. Məhz MTK-nın hazırkı rəhbəri kimi göstərilən şəxsin ortada olmaması bu iki problemi bizə yaradıb.
Cənab Vilayət Eyvazov, bu məsələdə Fövqəladə Hallar Nazirliyi və Baş Prokurorluq yanında Korrupsiyaya qarşı Mübarizə Baş İdarəsi bizə hər bir köməkliyi göstərir. Yəni FHN tərəfindən binanın istismara götürülməsi və digər texniki məsələlərin həlli üçün müvafiq sənədlər toplanıb, hər hansı problem qalmayıb, sadəcə, Abuzərov Rusif Lətif oğlu yoxdur ki, istismar aktına imza atsın və FHN də işi nəzarətə götürə bilsin. Onun ortada olmaması səbəbindən FHN müvafiq addımlar ata bilmir.
Ona görə biz sakinlərin yeganə ümidi Sizin həmin şəxslə bağlı məsələni nəzarət götürməyinizdir. Cənab nazir, biz illərdir ki, hamı kimi normal mənzil şəraitimizin olmasını, ailələrimizin, uşaqlarımızın sevinməsini istəmişik. Ancaq dələduzların üzündən başımıza gəlməyən iş qalmayıb. Çox şükür ki, indi bu işlərin böyük hissəsi dövlət rəhbərliyinin diqqəti nəticəsində həllini tapıb. Hazırda yeganə problem Abuzərov Rusif Lətif oğlunun yerinin müəyyən edilməsi və tapılıb gətirilməsinin təmin olunmasıdır ki, MTK sədri kimi həmin sənədləri imzalasın, biz də mənzillərimizə Çıxarış əldə edək. Buna görə bizə prokurorluq da, FHN da kömək etməyə hazırdır. Yetər ki, həmin adı çəkilən şəxsin tapılması təmin olunsun.
Ona görə də Sizdən yeganə xahişimiz bu məsələ ilə bağlı polis orqanlarına tapşırıq verməyinizdir. Biz polisimizə inanırıq ki, bu problemin qısa müddətdə həllində köməklik göstərəcək və hamımızı sevindirəcək..."

anaxeber.info.az

Ordubad rayonunun Behrud kəndini birə basdığı, dezinfeksiya üçün sakinlərdən pul tələb olunduğu bildirilir. Sakinlərin sözlərinə görə, sanitar xidmət birə basan yerləri dərmanlamaq üçün hər kvadratmetrə 20 manat tələb edir.

Ərazinin minlərlə kvadratmetr olduğu nəzərə alınanda, tələb olunan məbləğin sakinlər üçün çox böyük olduğu bildirilir.

Kənd sakinləri “Gündəlik Naxçıvan”a deyirlər ki, problemlə bağlı Naxçıvan MR İctimai Səhiyyə Xidmətinə müraciət etsələr də, onlardan dərmanlama üçün pul tələb olunub:

“Problem kənd boyu yayılır, amma aidiyyəti qurumlar kömək etmək əvəzinə camaatdan pul istəyirlər. Kəndin içini birə basıb. Deyilənə görə, bir nəfər kəndə keçilər gətirib, problem də həmin heyvanların saxlandığı tövlədən başlayıb. Sonra tövlələrin ətrafına, yollara, yaşayış evlərinə yayılıb. İnsanların üstünə qonur, ordan da evlərə daşınır.

Camaat dəfələrlə şikayət edir, amma dövlət qurumları ciddi maraqlanmır. Baytar gəlib nəsə səpir, gedir, onun da heç bir təsiri olmur. Kənd həkimi sanitar stansiyaya müraciət edib ki, əhali şikayətlənir, kənddə birə yayılıb.

Ordan isə deyiblər ki, birə olan ərazilərin hər kvadratmetrinə 20 manat yığılsın, pulu verin, gəlib dərmanlayaq. Kənd böyükdür, bu hesabla camaat nə qədər pul toplamalıdır? Məsələn, 300 kvadrat həyəti dərmanlamaq üçün 6 min manat verməlisən. Əhalinin buna gücü çatmır”.

Sakinlər problemin artıq məktəbə də çatdığını deyirlər:

“Müəllimlər deyirlər ki, birə artıq məktəbə də çatıb. Məktəbə gələn işçilər həmin yoldan keçirlər, birə onların üstünə qonur, belə-belə məktəbə də daşınır. Artıq bir-iki nəfərin üstündə və bəzi siniflərdə tək-tək birə görünüb. Bu gün-sabah məktəb açılacaq. Uşaqları buraxmağa qorxuruq. Problem dərhal həll olunmalıdır”.

Məsələyə münasibət öyrənmək üçün Naxçıvan MR İctimai Səhiyyə Xidmətinə müraciət etsək də, cavab ala bilmədik.

"2025-ci ildə Beynəlxalq Karyera Akademiyasında "təhsil aldım". "Təhsilimi başa vurduqdan" sonra mənə təqdim olunan “diplom” isə 2024-cü il tarixi ilə verilmişdi..." "Diz.az" xəbər verir ki, bunu özünün sosial şəbəkə hesabındakı paylaşımında Aysel Şıxiyeva adlı istifadəçi yazaraq gileylənir.
Narazı vətəndaş daha sonra başına gələnləri belə nəql edir: "Bundan əlavə, sənəddə ata adı qeyd olunmayıb və diplomun üzərində çoxlu qaralamalar mövcuddur.Diplomun yenidən hazırlanmasını dəfələrlə tələb etsəm də, məsələ artıq təxminən 1ildir uzadılır və nəticə əldə olunmurdu.
Bununla yanaşı, GLP diplomunun hazırlanması da aylarla gecikdirildi. 1 il yarımdan sonra elektron formada “diplom” göndərildi. Lakin həmin vaxta qədər artıq bu sənədə ehtiyacım qalmamışdı.
Digər məsələ isə Almaniyada keçiriləcəyi bildirilən təlimlə bağlıdır. Təlim üçün ödəniş etmişdim və təlimin 6–8 ay ərzində keçiriləcəyi bildirilmişdi. Lakin artıq 1 ildən çox vaxt keçib və təlimlə bağlı heç bir məlumat verilməyib. Ödənişin geri qaytarılacağı ilə bağlı da söz verilsə də, bu günə qədər vəsait geri qaytarılmayıb.
Dərsləri sonradan izləyə bilməyimiz üçün şəxsi kabinet yaradılacağı da bildirilmişdi. Lakin bu vəd də yerinə yetirilmədi.
Məsələ ilə bağlı rəsmi e-mail ünvanlarına dəfələrlə müraciət etmişəm. Mənə ödənişin “geri qaytarıla biləcəyi” bildirilsə də, bundan sonra müraciətlərimə konkret cavab verilməyib və məsələ yenə də nəticəsiz qalıb.
Təəssüf ki, mənim şəxsi təcrübəmdə proses ödəniş alınana qədər kifayət qədər aktiv və operativ görünsə də, ödənişdən sonra müxtəlif gecikmələr, cavabsız müraciətlər və yerinə yetirilməyən vədlərlə qarşılaşdım.
Bu paylaşımı etməkdə məqsədim heç kimi ittiham etmək deyil, sadəcə öz təcrübəmi bölüşərək başqalarının eyni vəziyyətlə qarşılaşmamasına kömək etməkdir.
Bu qurumla təhsil və ya digər xidmətlərlə bağlı əməkdaşlıq etməyi düşünürsünüzsə, qərar verməzdən əvvəl bütün şərtləri, sənədləşməni, ödəniş və geri qaytarma qaydalarını əvvəlcədən ətraflı şəkildə dəqiqləşdirməyinizi tövsiyə edirəm.
Şəxsi təcrübəmə əsasən, belə bir qərar verməzdən əvvəl çox diqqətli olun və verilən vədlərin yazılı şəkildə təsdiqlənməsinə əmin olun..."

Diz.az

"Biz, "Construction Business Group" şirkətində çalışan işçilər, bildiririk ki, 2026-cı ilin yanvar ayından etibarən əməkhaqlarımız ödənilmir..." Bu sözlər işçilər adından ölkə rəhbərliyinə ünvanlanmış müraciətdə yer alıb.

Sözügedən qurumun Naxçıvanda çalışan işçilərinin yazdığı müraciətdə daha sonra deyilir: "Artıq uzun müddətdir ki, işləməyimizə baxmayaraq, əməkhaqlarımızın verilməməsi səbəbindən ciddi maddi çətinliklərlə üz-üzə qalmışıq. İşçilərin ailə, kredit, kirayə və digər gündəlik xərcləri olduğundan əməkhaqlarının vaxtında ödənilməməsi bizim sosial vəziyyətimizə ciddi təsir göstərir.
Məsələ ilə bağlı dəfələrlə aidiyyəti şəxslərə müraciət etsək də, problemimiz bu günədək öz həllini tapmamışdır.
Hörmətli cənab Prezident!
Sizdən xahiş edirik ki, müraciətimizi nəzərə alasınız, "Construction Business Group" şirkətində çalışan işçilərin 2026-cı ilin yanvar ayından bu günədək ödənilməmiş əməkhaqlarının araşdırılmasına və əməkhaqlarımızın ödənilməsi üçün müvafiq tədbirlərin görülməsinə köməklik göstərəsiniz.
Ümid edirik ki, müraciətimiz diqqətdə saxlanılacaq və yaşadığımız problemin ədalətli həlli üçün müvafiq tədbirlər görüləcəkdir..."

Qeyd edək ki, narazılıq yaradan şirkətin rehberi Elmir Babayev Vaqif oğludur.

Naxçıvanda Hacıvar məktəbi, Babək rayon DSMF, Culfa rayon DSMF, Ordubad rayon DSMF, Kəngərli rayon DSMF və Sədərək rayon DSMF kimi qurumlarda işləyən işçilərin əmək haqqı 2026-cı ilin yanvar ayından ödənilmir.(Dia-az)

Məsələ diqqətimizdədir...

Goranboy şəhər 2 saylı tam orta ümumtəhsil məktəbində görünməmiş hadisə yaşanıb. İşində yol verdiyi ciddi nöqsanlara və törətdiyi qanunsuz əməllərə görə vəzifəsindən azad edilən keçmiş direktor İlhamə Qasımova qəzəbinə hakim ola bilməyərək təhsil müəssisəsinin əmlakına zərər vurub.

Gundemxeber.org-a daxil olan əlumata görə, keçmiş direktor məktəbin sanitariya qovşağını dağıdaraq unitazı və əl-üz yuma avadanlıqlarını söküb öz evinə aparıb.

İdarəçilik Böhranı və Valideynlərin Narahatlığı

Baş verən bu vandalizm aktı sadəcə emosional bir davranış deyil, təhsil sistemindəki idarəçilik boşluqlarının və kadr seçimindəki problemlərin bariz göstəricisidir. Təhsil ocağında bu cür özbaşınalığın baş verməsi valideynlər və şagirdlər arasında böyük təşvişə səbəb olub.

Valideynlər haqlı olaraq sual edirlər: Məktəb əmlakını söküb evinə daşıyacaq qədər iradəsiz və aqressiv bir şəxs illərlə uşaqlarımızın tərbiyəsi ilə necə məşğul olub?

Cəmiyyətdə "mənəvi terror" kimi qiymətləndirilən bu addım, təhsil müəssisəsinə və müəllim adına vurulan ağır zərbədir. Məsələ ilə bağlı aidiyyəti qurumların hüquqi müstəvidə addım atacağı və dəymiş ziyanın bərpası istiqamətində tədbir görəcəyi gözlənilir.

Qarşı tərəfin və məktəb kollektivinin də mövqeyini dinləməyə hazırıq.