Xəbər verdiyimiz kimi, Azərbaycanda aylıq pensiyaların orta məbləği ötən ilin eyni dövrü ilə müqayisədə 10,5 faiz artaraq 594,4 manata çatıb.

Bəs pensiyalardakı bu artım vətəndaşların sosial rifahına nə dərəcədə təsir edir? Mövcud məbləğlər hazırkı yaşayış xərcləri fonunda kifayət edirmi?

Globalinfo.az-a danışan Azərbaycan Qiymətləndiricilər Cəmiyyətinin sədri, iqtisadçı Vüqar Oruc deyib ki, bu artım müsbət haldır:

“Lakin nəzərə almaq lazımdır ki, orta pensiya bütün pensiyaçıların məhz bu məbləği aldığı anlamına gəlmir. Hazırda minimum pensiya 320 manatdır və pensiyaların əhəmiyyətli hissəsi orta göstəricidən aşağıdır. Eyni zamanda, müxtəlif dövlət vəzifələrində və yüksək əməkhaqqı olan sahələrdə çalışmış vətəndaşlar daha yüksək pensiya alırlar. Nəticədə yüksək və aşağı pensiyaların ümumi riyazi ortalaması 594 manat 40 qəpik təşkil edir. Hazırda orta aylıq əməkhaqqının 1000 manatdan yüksək olduğunu nəzərə alsaq, orta əməkhaqqı ilə orta pensiya arasındakı fərqin azalması məqsədəuyğun olardı. Bu, pensiyaçıların sosial vəziyyətinin yaxşılaşmasına da müsbət təsir göstərə bilər”.

İqtisadçı bildirib ki, pensiyaların artımını qiymətləndirərkən yalnız nominal artıma deyil, ərzaq, dərman, qeyri-ərzaq məhsulları, yanacaq və digər zəruri xərclərin qiymətlərindəki dəyişikliklərə də diqqət yetirmək lazımdır:

“Əgər qiymət artımı pensiyaların artım tempini üstələyirsə, nominal artımı əhalinin real rifahının yüksəlməsi kimi qiymətləndirmək mümkün deyil. Bu baxımdan sosial rifahın yaxşılaşdırılması üçün bir sıra addımların atılmasına ehtiyac var. İlk növbədə minimum əməkhaqqının 400 manatdan 660 manata, yəni orta aylıq əməkhaqqının təxminən 60 faizinə qədər artırılması məqsədəuyğun olardı. Eyni zamanda, pensiya yaşında olan vətəndaşların pensiyalarının minimum əməkhaqqı səviyyəsinə yaxınlaşdırılması vacibdir”.

Ekspertin sözlərinə görə, hazırda aylıq istehlak səbətinin təxminən 300 manat səviyyəsində müəyyənləşdirilməsi real xərcləri tam əks etdirmir:

“Mövcud qiymətləri nəzərə alsaq, bir nəfərin minimum səviyyədə yaşaması üçün zəruri xərclərin təxminən 600 manat civarında qiymətləndirilməsi daha real görünür. Buna görə də həm minimum pensiyanın, həm də minimum əməkhaqqının artırılmasına ehtiyac var. Digər tərəfdən, minimum əməkhaqqı ilə çalışan bəzi vətəndaşlar özəl müəssisələrdə əmək müqaviləsində göstəriləndən əlavə gəlir əldə edir və bu vəsait müəyyən hallarda nağd şəkildə ödənilir. Bu isə vergidən yayınma hallarına səbəb ola bilər.

Bütün hallarda orta pensiya məbləğinin artması müsbət göstərici olsa da, onun vətəndaşların gündəlik həyatına real təsirini qiymətləndirmək üçün qiymət artımının səviyyəsi də nəzərə alınmalıdır. Buna görə də həm minimum pensiyanın artırılması, həm də istehlak səbətinin hesablanması mexanizminə yenidən baxılması vacibdir”.

Nabranda “Palermo” adlı klubda göstərilən xidmət və qiymətlərlə bağlı sosial şəbəkədə narazılıq ifadə olunub.
Bu barədə Nigar Əmirbəyova sosial media hesabında paylaşım edib.
O, paylaşımında obyektin müştərilərə təqdim etdiyi hesabda depozit məbləğinin göstərilməsini və masaya təqdim olunan məhsulların qiymətlərini tənqid edib. Nigar Əmirbəyova xüsusilə qarpızın qiymətinə diqqət çəkərək, onun 35 manata hesablandığını bildirib. Xanım Əmirbəyova təqdim olunan qarpızın vəziyyətinin də qənaətbəxş olmadığını iddia edib.

“Camaatı yoxlamağın məncə son stadiyası...” ifadəsi ilə başlayan paylaşımda hesabın içində depozit məbləğinin göstərilməsi də sual altına alınıb.
Müəllif eyni zamanda Nabranın “Palermo” klubunu və ümumilikdə turizm obyektlərini xidmət səviyyəsinə görə tənqid edərək, restoran, kafe və klublara nəzarət məsələsinin diqqətdə saxlanılmasının vacibliyini vurğulayıb. Paylaşımda, həmçinin, turizmin inkişafından danışıldığı halda bəzi obyektlərdə müştəriyə göstərilən xidmət və qiymət siyasətinin narazılıq doğurduğu qeyd olunub.

Bizimesr.media

Vətəninfo.az-ın redaksiyasına Naxçıvan Muxtar Respublikası Babək rayonunun tanınmış təhsil ocaqlarından olan Sirab kənd tam orta məktəbində son illər baş verən qanunsuzluqlar, özbaşınalıqlar və ciddi hüquqpozmalarla bağlı məlumatlı mənbələrdən şokeedici iddialar daxil olub.
İllərdir yüksək nəticələri və nümunəvi nizam-intizamı ilə seçilən məktəbin bu gün yarıtmaz idarəçilik ucbatından anarxiya və zorakılıq mərkəzinə çevrildiyi bildirilir.
Mənbənin iddiasına görə, məktəb rəhbərliyinin şagirdlərə qarşı tətbiq etdiyi fiziki şiddət artıq idarəolunmaz həddə çatıb və bir çox insidentlər polisin müdaxiləsi ilə nəticələnib.
Daxil olan məlumatda qeyd olunur ki, direktorun təzyiqlərinə dözməyən məktəblilərin etirazları zamanı ciddi vandallıq halları yaşanıb: direktorun döydüyü şagirdlərdən biri qəzəbindən məktəbin həyətindəki şam ağaclarını və elektrik dirəklərini yerindən çıxarıb. Başqa bir halda isə attestat verilməməsi və döyülməsi səbəbindən şagird bir neçə sinif otağının qapısını sındıraraq etirazını bildirib.

Məlumatda həmçinin ötən il dərslər zamanı yuxarı sinif şagirdləri arasında baş verən bıçaqlı dava məsələsinin də ört-basdır edildiyi iddia olunur. İddiaya görə, insidentdə adı keçən şagirdlərdən birinin məhz dərs hissə müdirinin xalası oğlu olması məsələnin tez-tələsik barışıqla bağlanmasına səbəb olub.
Bundan əlavə, məktəbə adı verilən şəhid Nüsrət Məmmədovun xatirəsinə hər il mayın 18-də keçirilən anım tədbirinin son 4 ildə keçirilmədiyi, əvəzində isə anım günündən bir gün sonra direktor və dərs hissə müdirinin özlərinə təntənəli ad günü təşkil etdikləri bildirilir. Müəllimlərdən bu məqsədlə məcburi pul yığıldığı və pulların bölgüsündə narazılıq yarandığı da iddialar arasındadır.
Redaksiyamıza daxil olan son məlumata görə, iyun ayının sonunda direktorun yenə bir şagirdə qarşı tətbiq etdiyi fiziki şiddət böyük insidentlə nəticələnib.
Döyülən şagirdin qəzəbi nəticəsində məktəb daxilində Ulu Öndər Heydər Əliyevin şəklinin olduğu şərəf lövhəsinin dağıdıldığı, sinif qapılarına vurulan şəhid şəkillərinin qoparılaraq yerə atıldığı bildirilir. Hadisə zamanı dərs hissə müdirinin ölkədə olmadığı qeyd olunur.

Mənbə həmçinin məktəbdə əmək hüquqlarının pozulduğunu, gecə nəzarətçilərinin qanunsuz olaraq saat 18:00-dan axşam saat 02:00-dək işlədildiyini, nəticədə saat 02:00-dən səhərə qədər məktəb binasının nəzarətsiz qaldığını vurğulayır.
Valideynlərin və ictimaiyyətin ciddi narahatlığına səbəb olan bu iddialarla bağlı Naxçıvan Təhsil Nazirliyindən münasibət öyrənməyə çalışacağıq. Mövzu diqqətimizdədir.

Bir neçə gün əvvəl Tribuna.az DİM rəhbərliyinin dəyişdiriləcəyi və Məleykə Abbaszadənin yerinə ADNASU-nun rektoru Rüfət Əzizovun gətiriləcəyi barədə xəbər yaymışdı.

Bildirək ki, həmin xəbərdə Abbaszadəınin yaşının nəzərər alaraq, pensiyaya göndəriləcəyi qeyd edilmişdi. Təyinatın yaxın günlərdə reallaşacağı vurğulanırdı.

Qeyd edək ki, bu məlumat sosial şəbəkələrdə müzakirələrə səbəb olub. Belə ki, sosial şəbəkə fəallarından olan və vaxtıyla Təhsil İnstitunda çalışmış Könül Aydın Rüfət Əzizov haqqında iddialar səsıləndirib.

Onun iddiasına görə, DİM-in rəhbərliyinə gətirilməsi gözlənilən Əzizovun Fətullah Gülənlə əlaqəsi var. “Amandır, etməyin. Bir ölkəyə zərrəcə hörmətiniz varsa, etməyin. Bu gəlsə, ölkəni Fətullah Gülənin şəbəkəsi tamamilə idarə edəcək. Mətaha da döndərməyin, adi bir korrupsionerdir”.

Könül Aydın özünün sosial şəbəkə hesabında yazıb ki, Əzizov Təhsil İnstitutunda direktor olduğu müddətdə MİQ imtahanları tamamilə keçdi kurs idarəçilərinin əlinə. “Rüfət Əzizov Təhsil İnstitutuna direktor təyin ediləndə mən həmin institutda Əlavə təhsilin məzmunu şöbəsinin müdiri idim. MİQ imtahanının aparılmasında iştirak edirdim. Həmin il gördüm ki, çöldə nə qədər tanınmış kurs var, hamısının məsul işçiləri bunkerdədirlər imtahan testlərini hazırlayırlar. İmtahandan sonra Şamaxıya dincəlməyə getdik. Onda elə o kurs adamlarının önündə Rüfət Əzizova dedim ki, bu bazar adamları niyə imtahan suallarını yazırlar. Mən bu instituta gələndə məni inandirmışdılar ki, biz təhsili korrupsiyadan təmizləmək üçün gəlmişik, mən də burada şöbə müdiri olmağa razılıq vermişdim. Fəaliyyətim müddətində köhnə korrupsionerlərə qarşı sərt idim, onlar tələblərimə dözməyib ya işdən gedir, ya da yaramazları özüm işdən çıxarırdım. Belə çıxır ki, mən o köhnə korrupsionerlərin günahına batmışam. Nə fərqi vardı – o korrupsionerlər, yoxsa bu bazar adamları?”

Təhsil İnstitutunun keçmiş əməkdaşı daha sonra bildirib ki, bu çıxışı zamanı Rüfət Əzizov “lal və kar” kimi susub, bir kəlmə də cavab verə bilməyib. “Nəzakət Mehtiyeva oturduğu yerdə ölmüş, Nurlan İsmayılbəyli başı ilə sözlərimi təsdiq edirdi. Bu hadisəni burada çox adam xatırlayar. Böyük kollektiv qarşısında çıxış etmişdim. Nəzakət Mehtiyeva Şamaxıdakı bu toplantıdan öncə – Bakıda öz iş otağında mənə kurs rəhbərlərinin MİQ imtahanında iştiraklarını belə əsaslandırmışdı: “Onlar çöldə qalanda müəllimləri üstümüzə qaldırıb ETN qarsisunda aksiya keçirir, Feysbukda paylaşmalar edərək ajiotaj yaradırlar”. Hətta demişdi ki, iki kurs rəhbərini bu təxribata görə otağına çağırmışdı, onlar da onun gözü önündə bir-birlərini pis söyüşlərlə təhqir edərək, bir-birlərinin üzlərinə tüpürmüşdülər. Ona görə də ikisi də indi bunkerdə idilər”.

Könül Aydın daha sonra yazıb ki, həmin dönəmdən bəri imtahandan sonra səs çıxmır. “Diqqət edin, artıq neçə ildir, görün imtahandan sonra səs çıxırmı?! Demək, elə o vaxtdan MİQ kurslar arasında bölüşdürülüb. Bütün kurslar böyük güclərə məxsusdur. Allah qorusun, onlar mənə bir daha nəsə etmək istəyərlər. Biləsiniz. Baxın da”.

O yekunda Əzizov haqqında başqa məlumatlar da paylaşıb. Könül Aydın yazıb: “AGMA Rüfət Əzizovun idarəçiliyindən niyə alındı? Rüfət Əsədzadə niyə ölkədən qaçdı? Dövlət qurumları araşdırsınlar. Rüfət Əsədzadə bir trol qrupunu da idarə edirdi. Bu axmaqlar məni də oraya daxil edib vəzifə və yüksək məbləğdə xidmət haqqı təklif edirdilər. Görün nə qədər səfeh və beyin yerində hörümçək toru – Fətullah Gülənin şəbəkə siyasəti olan adamdırlar ki, hamını özləri kimi zənn edirlər. Qrupdan çıxıb nümayəndələrinə dedim ki, get, mənim adımdan bunların üzünə tupür.

Bu biabırçılıqlar gözümüzün önündə baş verdi. Ürəyimiz bulanır. Belə təbliğatlar aparmayın, xahiş edirik. Korrupsionerlerin , merkantil şəbəkə, təriqət adamlarının bir qurumu lokal olaraq idarəsinə birtəhər dözürük, övladlarımızın gələcək dünyasını tamamilə verməyin bunların əlinə!

Bununla işləyib tanımışam, əminliklə yazıram”.

Tribuna.az

Yasamal rayonunda yerləşən 98 saylı dövlət uşaq bağçası ilə bağlı son dərəcə ciddi iddia sosial şəbəkədə ictimailəşdirilib. Elnurə Abuşova adlı sosial şəbəkə istifadəçisinin açıq paylaşımında bildirilir ki, ailə övladını təxminən bir həftədir sözügedən dövlət bağçasına göndərir və bundan sonra uşağın davranışında qeyri-adi dəyişikliklər müşahidə olunub.

Paylaşım müəllifinin sözlərinə görə, ailə yaranmış şübhələrdən sonra uşağa analiz verdirib və analiz nəticəsində uşağın qanında psixotrop təsirə malik dərman maddəsinin aşkarlandığı bildirilib.

Məsələ artıq sadəcə şifahi məlumat deyil — azyaşlı ilə bağlı belə ağır iddia sosial şəbəkədə açıq şəkildə ictimailəşdirilib və Elm və Təhsil Nazirliyi ilə Daxili İşlər Nazirliyinin adı çəkilərək məsələyə müdaxilə tələb olunub.

Lakin hazırda əsas məsələ tibbi analiz sənədinin araşdırılmasıdır. Analiz nəticəsinin əsli, hansı maddənin müəyyən edildiyi, onun konsentrasiyası, analizin hansı tibb müəssisəsində və nə zaman aparıldığı hüquq-mühafizə orqanları tərəfindən yoxlanılmalıdır.

Əgər araşdırma nəticəsində azyaşlıya valideyninin xəbəri və həkim göstərişi olmadan hər hansı psixotrop və ya sakitləşdirici preparatın verilməsi təsdiqlənərsə, ortaya olduqca ağır suallar çıxacaq: uşağa dərmanı kim verib, hansı məqsədlə verib, bağça rəhbərliyinin bundan xəbəri olubmu və dövlət bağçasında belə preparat ümumiyyətlə necə peyda olub?

Digər tərəfdən, 98 saylı dövlət uşaq bağçasının üzərinə belə ağır ittiham qoyulduğu üçün müəssisənin mövqeyi də alınmalı, iddianın həqiqətə uyğun olub-olmadığı rəsmi araşdırma ilə müəyyən edilməlidir.

Azyaşlının sağlamlığından söhbət gedirsə, məsələni “araşdırarıq” deyib uzatmaq olmaz. Kamera görüntüləri qorunmalı, uşağın bağçada təmasda olduğu şəxslər müəyyənləşdirilməli, tibbi analiz ekspertizadan keçirilməli və nəticə ictimaiyyətə açıqlanmalıdır.(Bntv.az)

Peşə təhsili haqqında danışanda qarşıya həmişə böyük hədəflər qoyulur: əmək bazarına uyğun kadr hazırlığı, müasir peşələr, güclü maddi-texniki baza, praktiki bacarıqlar və işə hazır məzunlar.

Bəs bütün bu vədlərin qarşılığında real vəziyyət necədir?

Peşə təhsilinin ən böyük problemi, bəlkə də, məhz burada başlayır: kağız üzərində hər şey var, amma praktiki nəticə nə qədərdir? Peşə məktəbində aşpaz hazırlanırsa, tələbə, həqiqətən, mətbəxdə işləyərək öyrənirmi? Avtomobil ustası yetişdirilirsə, onun real avtomobil üzərində işləməsi üçün şərait yaradılıbmı? Elektrik, qaynaq, mexanika və digər ixtisaslarda tələbə müasir avadanlıqla praktiki məşğələ keçir, yoxsa yenə də əsas yük nəzəri dərslərin üzərində qalır?

Çünki peşə təhsilinin mahiyyəti yalnız dərs keçmək deyil. Peşə təhsili tələbənin əlinə peşə verməkdir. Əgər tələbəyə lazım olan avadanlıq, material və praktiki imkan yaradılmırsa, onda verilən diplom həmin gəncin əmək bazarında real bacarığını nə dərəcədə təmin edə bilər?

Burada isə daha ciddi suallar meydana çıxır.

Peşə təhsilinin inkişafı üçün dövlət büdcəsindən nə qədər vəsait ayrılıb?

Bu vəsait hansı layihələrə yönəldilib?

Avadanlıqların alınması üzrə satınalmaları kimlər həyata keçirib?

Tenderləri hansı şirkətlər qazanıb?

Alınan avadanlıqlar bu gün peşə məktəblərində faktiki istifadə olunurmu?

İstehsalat və praktiki təlim üçün nəzərdə tutulan materiallar tələbələrə tam həcmdə çatdırılırmı?

Və ən mühüm sual:

Bu xərclərin sonunda əmək bazarına nə qədər hazırlıqlı mütəxəssis çıxır?

Çünki milyonlarla vəsait xərcləmək öz-özlüyündə uğur göstəricisi deyil. Yeni bina tikmək nəticə deyil. Avadanlıq almaq nəticə deyil. Təlim keçirmək də nəticə deyil. Nəticə həmin avadanlığın arxasında dayanaraq peşə öyrənən tələbədir. Nəticə məzunun iş tapa bilməsidir. Nəticə işəgötürənin “bu məzun peşəsini bilir” deməsidir.

Əgər bütün bunlar ölçülmürsə, onda ortaya haqlı bir sual çıxır:

Bəs görülən işlərin səmərəliliyini kim və necə qiymətləndirir?

Peşə Təhsili üzrə Dövlət Agentliyi cəmiyyətə yalnız görülən işlərin siyahısını deyil, onların nəticələrini də təqdim etməlidir.

Hansı layihəyə nə qədər pul ayrılıb? Nə alınıb? Kim alıb? Nə qədər müddətə həyata keçirilib? Nə vəd edilib? Və bu gün həmin layihənin nəticəsi nədir?

Bu suallar cavablandırılmadan “peşə təhsilində inkişaf gedir” demək kifayət deyil. Çünki dövlət vəsaiti xərclənirsə, onun qarşılığında ölçülə bilən nəticə də olmalıdır. Peşə təhsilində artıq təqdimatların, tədbirlərin və layihələrin sayını deyil, tələbənin əlinə keçən real peşəni ölçmək zamanıdır. Pul xərclənir. Layihələr həyata keçirilir. Avadanlıqlar alınır.

Bəs bütün bunların sonunda:

Nəticə haradadır?

Tehsilmedia.com

Jurnalist İlkin Muradov Sabunçu Rayon İcra Hakimiyyətinin iki əməkdaşının vətəndaşdan 22 min manat rüşvət aldığı və daha sonra həmin məbləği geri qaytararaq pulu aldıqlarını təsdiqləyən akta imza atdığı barədə iddia irəli sürüb.

Bizimesr.media xəbər verir ki, İlkin Muradov hadisənin təfərrüatlarını açıqlayıb.

Jurnalistin sözlərinə görə, onun uşaqlıq dostu illər əvvəl Sabunçuda aldığı torpaq sahəsində fərdi yaşayış evi tikmək istəyib.

Bununla bağlı icra hakimiyyətinin mühəndisi ilə əlaqə saxlanılıb. Muradovun iddiasına əsasən, mühəndis tikinti məsələsinin “dədə-baba qaydası” ilə həll olunmasını təklif edib və bunun qarşılığında 22 min manat pul alıb.

İlkin Muradov yazır ki, mühəndisin dediyinə görə, həmin pul üç qurum arasında bölüşdürülməli olub. 6 min manat isə icra hakimiyyətinə çatdırılması üçün mühəndis tərəfindən başqa bir vəzifəli şəxsə verilib.

Bundan sonra evin tikintisinə başlanılıb.

Jurnalistin iddiasına görə, tikinti işləri aylarla davam edib və evin pəncərələri quraşdırılarkən icra hakimiyyətinin əməkdaşları tərəfindən tikili sökülüb.

Muradov bildirir ki, hadisədən təxminən 6-7 ay sonra pulun icra hakimiyyətinə çatmalı olan hissəsinin verilmədiyi məlum olub.

Jurnalistin sözlərinə görə, dostu dəfələrlə Sabunçu Rayon İcra Hakimiyyətinin başçısı Adil Vəliyevin qəbulunda olub.

İddia edilir ki, həmin görüşlər zamanı 22 min manatı alan iki şəxs pulu aldıqlarını təsdiqləyiblər.

Muradov yazır ki, vətəndaşa müxtəlif vaxtlarda evin səhvən söküldüyü, kompensasiya veriləcəyi və ya başqa ərazidə torpaq sahəsi ayrılacağı bildirilib. Bu danışıqların aylarla davam etdiyi qeyd olunur.

“22 min manatı geri qaytardılar və akt imzaladılar”

İlkin Muradovun fikirlərində ən diqqətçəkən məqam kimi vətəndaşın rəsmi qurumlara şikayət etməsindən sonra baş verən hadisədir.

Jurnalistin iddiasına görə, vətəndaş bir neçə gün əvvəl rəsmi qurumlara müraciət etməyə başlayıb. Bundan sonra icra başçısının göstərişi ilə sözügedən iki məmur aldıqları 22 min manatı geri qaytarıb.

Muradov bildirir ki, bununla bağlı akt da tərtib olunub və hər iki məmur həmin sənədə imza atıb.

“İcra başçısının göstərişi ilə onun işçiləri vətəndaşdan 22 min rüşvət aldıqlarını təsdiq edən sənədə imza atıblar”, – deyə jurnalist yazıb.

Muradov qeyd edir ki, əvvəlcə bu məlumatı eşidəndə buna inanmayıb, lakin sonradan sənədi öz gözləri ilə gördüyünü bildirib.

Jurnalistin paylaşımına görə, məsələnin daha bir diqqətçəkən tərəfi 22 min manat aldığı iddia olunan şəxslərin ailə əlaqələridir. Muradov həmin şəxslərdən birinin atasının, digərinin isə əmisinin yüksək vəzifəli şəxslər olduğunu qeyd edib. Hazırda bu iddialarla bağlı Sabunçu Rayon İcra Hakimiyyətinin, adıçəkilən məmurların və digər aidiyyəti şəxslərin mövqeyi məlum deyil.

Qeyd edək ki, Adil Vəliyev 2012-ci ildən Sabunçu Rayon İcra Hakimiyyətinin başçısı vəzifəsini tutur. Zəruri qeyd: məsələ ilə bağlı qarşı tərəfin mövqeyini dərc etməyə hazırıq.

Bizimesr.media

Dövlət Məşğulluq Agentliyinin rəsmi saytında Azərbaycan vətəndaşlarına Türkiyədə yaşlı və xəstə insanlara baxıcı, Sloveniyada isə fəhlə və digər işlər təklif olunur. Layihənin adı isə “Azərbaycandan işçi qüvvəsinin ixracı”dır. Bu məlumatın paylaşılması cəmiyyətin müxtəlif təbəqələri arasında birmənalı qarşılanmayıb və müzakirələrə yol açıb.
KONKRET.az xəbər verir ki, məsələ ilə bağlı danışan beynəlxalq idarəetmə sistemləri üzrə mütəxəssis, iqtisadçı Asif İbrahimovun sözlərinə görə, qəribə səslənsə də, hökümət bizə iş verə bilmədiyini deməyə çalışır:

“Deyirlər ki, get xarici ölkələrdə fəhlə işlə, xəstələrin altını təmizlə və başını dolandır. Burda sual yaranır ki, niyə həmin insan üçün Azərbaycanda iş yarada bilmirlər? Çünki, artıq iqtisadi modelin effektsizliyini dövlət qurumları da gizlədə bilmir. Faktı da etiraf edirlər ki, problem iqtisadi modeldədir. Əgər iqtisadi model məhsuldar və layiqli gəlirli iş yerləri yaratmırsa, regionlarda iqtisadi fəallıq zəifdirsə və gənclər ölkə daxilində gələcək görmürsə, nəticə işsizlik və miqrasiya olur. Sonra isə həmin problemi xaricə göndərməklə həll etdiyimizi düşünürük. İşsizliyi ölkədən çıxarmaq işsizliyi həll etmək deyil, işsizliyi ixrac etməkdir. İnsan ölkədə iş tapa bilmir, xaricə gedir, statistika yaxşılaşır və bunu məşğulluq uğuru kimi təqdim edirik. Halbuki onun əməyi, gəliri və yaratdığı əlavə dəyər başqa iqtisadiyyata xidmət edir. Biz isə statistika ilə təsəlli tapırıq. Xüsusilə də regionlardan gənclərin getməsi demoqrafik, sosial və iqtisadi baxımdan daha ciddi itkilər yaradır”.

Ekspert vurğulayıb ki, məsələ ixtisaslı kadrlara gəldikdə isə itki daha böyükdür:
“Həkim, müəllim, mühəndis və digər mütəxəssislər illərlə təhsil və dövlətin, ailənin, cəmiyyətin sərmayəsi hesabına formalaşır. Onu ölkə daxilində layiqli iş və gəlirlə təmin edə bilməyib xarici əmək bazarına göndəririksə, təkcə işçini deyil, insan kapitalını və gələcək əlavə dəyəri itiririk. Mən xaricdə işləməyi pisləmirəm. Sadəcə xaricdə işləmək seçimdirsə, bu normaldır, yox məcburiyyətdirsə, deməli iqtisadi problemdir. Beləki, işçini və işsizliyi xaricə ixrac etmək ən asan yoldur. Çətin olan isə iqtisadi modeli dəyişmək, yeni sektorlar yaratmaq, regionlarda real iqtisadi aktivlik formalaşdırmaq və insanlara ölkə daxilində gələcək verməkdir”, – deyə iqtisadçı bildirib.

KONKRET.az

Daha öncə plastik cərrah kimi fəaliyyət göstərən, bir müddət əvvəl isə sertifikatı ləğv olunan Elnur Mehrəli bu sahə üzrə özünü reklam edir.
Xitab24.az-ın məlumatına görə, onun sosial şəbəkələrdə reklamı yayılır.
Həmin reklamlara keçid zamanı isə rinoplastika və bədənşəkilləndirmə ilə bağlı məlumatlar və fotolar təqdim edilir.
Qısa arayış olaraq bildirək ki, Səhiyyə Nazirliyinin fəaliyyətinə icazə verilən plastik-estetik cərrahların siyahısında Elnur Mehrəlinin adı yoxdur.
Xitab24.az Məsələ ilə bağlı Səhiyyə Nazirliyinin Analitik Ekspertiza Mərkəzinə sorğu ünvanlanıb.
Daha öncə saytımızda yayımlanan məlumatda “Yasamal Hospital”da Elnur Mehrali tərəfindən icra edilən əməliyyatın qüsurlu olması ilə bağlı pasiyentin prokurorluğa müraciət etdiyini bildirmişdi. Bakı Şəhər Prokurorluğu cinayət işinin başlanmasını rədd etdikdən sonra vətəndaş qərarın ləğvi üçün məhkəməyə müraciət edib. Məhkəmə isə Elnur Mehrəli ilə bağlı Səhiyyə Nazirliyinə sorğu göndərib.

Sorğuya cavab olaraq bildirilib ki, Elnur Mehrəlinin plastik cərrahiyyə ixtisası üzrə praktik fəaliyyətinə icazə verilməyib. Həmçinin onun Azərbaycanda tibb və əczaçılıq fəaliyyəti ilə məşğul olmaq hüququ olan şəxslərin dövlət reyestrində praktik tibb fəaliyyəti ilə məşğul olması barədə məlumatın olmadığı qeyd edilib.
Prosesin yekununda cinayət işinin başlanmasının rədd edilməsi ilə bağlı qərar ləğv olunub.
Məhkəmə hesab edib ki, müstəntiq tərəfindən Elnur Xalid oğlu Mehrəlinin plastik cərrahiyyə ixtisası üzrə praktik tibb fəaliyyəti ilə məşğul olmaq hüququnun olub-olmaması lazımi qaydada araşdırılmayıb. Həmçinin onun həmin tarixdə müvafiq dövlət reyestrində qeydiyyatda olub-olmaması Səhiyyə Nazirliyindən və aidiyyəti qurumlardan rəsmi qaydada dəqiqləşdirilməli idi.
Qərara əsasən, göstərilən hallar araşdırılmalı, cinayət hadisəsinin olub-olmamasına hüquqi qiymət verilməsi üçün ibtidai araşdırma orqanı tərəfindən tam, hərtərəfli və obyektiv araşdırma aparılmalıdır.

Xitab24.az

Bir neçə dəqiqə sonra Azərbaycan Prezidenti İlham Əliyev ilə Ermənistanın Baş naziri Nikol Paşinyan arasında görüş baş tutacaq.

Bu barədə APA-nın Bişkekə ezam olunmuş əməkdaşı xəbər verir.

Qeyd edək ki, Azərbaycan Respublikasının Prezidenti İlham Əliyev Şanxay Əməkdaşlıq Təşkilatının tədbirlərində iştirak etmək üçün avqustun 31-də Qırğız Respublikasına işgüzar səfərə gəlib.